DMI Nuummut nuuttoq
Danmarkimi silasiortut DMI-meersut Kalaallit Nunaanni immikkoortortaqarfiat Kangerlussuarmit Nuummut aqagu novembarip ulluisa pingajuanni nuunneqassaaq.
DMI-mmi Kalaallit Nunaanni immikkoortortaqarfiata allattoqarfissai Issittumi Sakkutooqarfiup allattoqarfeqarfianut nuunneqartussanngorput.
Silasiortut pingaarnerpaamik sullitaminnut - soorlu Naviairimut, politiinut, Air Greenlandimut, Royal Arctic Linemut Kalaallit Nunaannilu oqartussanut allanut qaninnerusumik inissisimanissartik kissaatigigaat DMI-p tusagassiutinut nalunaarummi allaaseraa.
AAMMA ATUARUK DMI-p silasiorfini Nuummut nuutileraa: Silarlorujussuarnerani ikiuisarneq pitsanngorsarniaraa
Issittumilu Sakkutooqarfik pingaarutilittut inissisimavoq. Sakkutuullu naalagaata, generalmajor Kim Jesper Jørgensenip, Issittumi Sakkutooqarfimmi pisortap, qanimut suleqatigiilernissaq nuannaarutigaa:
- DMI-p qaninnerusumik suleqatigineqalernissaa Issittumi Sakkutooqarfiup qilanaaraa, allattoqarfinnillu avitseqatigiilernissarput qilanaaraarput. DMI-p sikunik alapernaarsuiffia umiarsuatsinnut ilaatigut atortarparput, assersuutigalugulu annaassiniartoqarneranut atatillugu silamik ilimasaarutit aamma atortarlutigit, soorlu aamma Tunup avannaarsuani Sirius Patruljemut tunngatillugu suleqatigisarivut, Kim Jesper Jørgensen oqarpoq.
Oqartussat qanimut suleqatigineqarnerisa saniatigut DMI-p nunatsinni immikkoortortaata Kangerlussuarmit Nuummut nuunneqarnera assigiinngitsutigut iluaqutissartaqarpoq:
- Ilinniarfeqarfinnut ungasikkunnaarnerup malitsigisaanik imaassinnaavoq silasiorneq kalaallit inuusuttaasa soqutiginerulissagaat, DMI oqarpoq, nangillunilu:
- Kalaallit silasiortutut ilinniarsimasut siunissaq ungasinnerusoq eqqarsaatigalugu immaqa atorfinitsinneqarsinnaassapput, DMI oqarpoq.