DMI-p silasiorfini Nuummut nuutileraa: Silarlorujussuarnerani ikiuisarneq pitsanngorsarniaraa
Silap qanoq innera nunatsinni inuunermut sunniuteqangaatsiartarpoq. Sila tassanngaannartumik allanngorsinnaasarpoq ilaatigullu navianartoqartitsilersinnaasarluni.
Tamannalu pissutigalugu DMI-p tassa Danmarkimi Silamik Misissuisarfiup innuttaasut oqartussallu ajortoqavinnerani ikiuukkiartortartut qaninnerorusuppai.
DMI-p Nuummut nuunnissaa naatsumik:
* Nuummi immikkoortortassat nutaat apriilimi maajimi misilittarneqarnissaat pilersaarutaavoq, immikkoortumili nutaami sulineq aatsaat juuni 11-ani aatsaat aallartissaaq.
* Silasiortut sisamat suliffigisaat Nuummut nuunneqassapput.
Tigusiffik: DMI
DMI-p silasiorfimminik Kangerlussuup Mittarfianit Issittumi Sakkutooqarfiup Nuummi allaffianut nuunnissaanut tamanna pissutaasut ilagigaat, silasiorfiup pisortaata tullia nunatsinnilu immikkoortortaqarfimmi aqutsisua, Søren Olufsen paasissutissiivoq.
AAMMA ATUARUK Ilisimatooq malerujussuit ulinneralu nalinginnaanngitsut pillugit: Taama pisoqaqqikkumaarpoq
- Naak atuisartorpassuagut avataanit sullittaraluarigut kalaallinut inuiaqatigiinnut oqartussanullu upalungaarsimanermi pisuni akuusunut qaninnerunissarput iluaqutissartaqangaatsiarpoq.
- Tassani politiit, Issittumi Sakkutooqarfik, kommunit Upalungaarsimanermullu Ataatsimiititaliarsuaq eqqarsaatigaakka. Illoqarfimmi pissarsiarineqarsinnaanitsinnut iluaqutissarpassuarnik angusaqartoqarsinnaasoraara, Søren Olufsen oqarpoq.
Nuummi allaffik ukioq tamaat inoqartassasoq
DMI assigiinngitsutigut ikiorsiisinnaavoq. Taakku ujaasinerusinnaapput aamma innuttaasunut sila pillugu paasissutissiilluarnerusoqarsinnaalluni, pisortap tullia oqarpoq.
- Ilulissani ungasinngitsumi pisut assersuutigisinnaavagut, Kalaallit Nunaanni ulittarnermut ullumikkut najoqqutassaqanngilaq, Søren Olufsen oqarpoq, novembarimilu malerujussuaqarnera innersuussutigalugu.
- Tassani (upalungaarsimasullu aaqq.) ataatsimut qanoq oqarsinnaanitsinnik pisunilu taama ittuni qanoq iliorsinnaannginnitsinni nalilersuisinnaasuugutta iluaquteqassagaluarpoq, nangippoq.
AAMMA ATUARUK Illu malinnit anguneqartoq: Peroriartorfigisap sequminnera videoni takusaqattaarlugu sakkortuvoq
DMI-p nunatsinni silasiorfiani piffissami matumani aasakkut taamaallaat ulloq unnuarlu inoqartarpoq. Silasiorfilli Nuummut nuuppat allaffik ukioq naallugu ulloq unnuarlu inoqartalissaaq.
Søren Olufsenip oqarnera naapertorlugu saqquminerulerneq kalaallinut inuusuttunut silasiortunngorniarnissamut isummersitsinissaa aamma neriuutaavoq, taamaalillunimi silasiorfimmi kalaallinik silasiortunik siunissami atorfinitsitsisoqarsinnaalissammat.
Naalagaaffeqatigiit silasiorfiattut, DMI-p kalaallit inuiaqatigiit ajunnginnerpaamik sullinnissai akisussaaffigaa. DMI-p silarlunnerani ikiuinerup saniatigut avatangiisinik nakkutinninnermut atatillugu inissisimaffittaaminit aamma tapersiissuteqarsinnaanissani naatsorsuutigaa.
