- Isumaqarpunga immikkut ilisimasallit innuttaasuni tuniluunnerup siammarnissaanut isummernerat pingaarutiliusoq. Tuniluunneq siammaakkunnaamippat immikkoortut aallartikkiaarneqarsinnaalissapput, Herman Berthelsen oqarpoqAssi: Simon Uldum

Ammaassiartoqqinneq sukkasuumik pisinnaasoq, politikerit isummerput 

Danmarkimi tunillatsissimasut 5 procent ataappagu Kalaallit Nunaat ammariartornissaa pisinnaavoq. Statens Serum Institut-illi kisitsisaataasa takutippaat maannakkut Danmarkimi tunillatsissimasut 1 procent ataakkaat.

Kalaallit Nunaata ammaqqinnissaa qilanaarigaanni soorlumi kissaatit piviusunngorsinnaalissasut. 

Sisamanngornermi tusagassiortunik katersuutsitsinermi Naalakkersuisut siulittaasuat, Kim Kielsen (S) isummerpoq, Kalaallit Nunaata Danmarkimi nappaammik siaruaannera malillugu ingerlassasoq. Danmarkimilu tunillatsissimasut 5 procent ataappatigit ammariartoqqinneq aallartissasoq. 

Danmarkimili kisitsisit qimerlooraanni ammariartoqqilerneq qanittumiussagaluarpoq. 

Kisitsisit Peqqinnissaqarfiuq Aqutsisoqarfianniit aamma Statens Serum Institut-imeersut qiviaraanni danskit innuttaasut coronavirusimik tunillatsissimasut 0,19 procentiupput.

Danmarkimi tunillatsittunik misissuinermi tunillatsissimasut 5 % qaangersimanngippassuk ammananissaq aallartinneqarsinnaassaaq. 

Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa. 

Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput. 

Tamatuma saniatigut massakkut peqqusinerit innersuussutillu aalajangiusimaannarneqassapput. 

 Tuniluunnermut uutttuut - tassaavoq coronavirusimik tunillatsissimasup tunillaasarnera kisitsisinngorlugu taannalu 0,7-miippoq.   

AAMMA ATUARUK Kielsen: Nunatta ammaqqinnissaanut suli ulluliisoqanngilaq

Tamanna KNR-imut uppernarsarneqarpoq nakorsaaneq Henrik L. Hansen-imit. Pissutsilli mumeqqissinnaaneri eqqumaarivai.

 

- Danmarkimi eqqissisimarpasippoq maannarpiaq. Nalunngisatsituullu Danmark siammasissumik ammariartoqqippoq. Tamanna pissutsinik mumisitseqqissinnaavoq, Henrik L. Hansen oqarpoq.

Siumut: Immikkut ilisimasallit pisariaqarput

Kim Kielsen sisamanngornermi tusagassiortunik katersuutsitsinermi Kalaallit Nunaata ammaqqinnera ullulerumanngilaa. Inatsisartuni aqagu marlunngornermi eqqartorneqassaaq. Tassani pilersaarutaavoq Naalakkersuisut isummanik oqaaseqaatinillu katersissasut, periusissamik tamakkiisumik pilersitsinissaminnut atugassaminnik. 

Inatsisartuni amerlanerussuteqartut Siumumi aaliangersimasumik ulluliisoqarumanngilaq qaqugukku immikkoortoq 1, aallartissanersoq, taama oqarpoq Aningaasaqarnermut ataatsimiititaliami siulittaasoq, Hermann Berthelsen.

- Isumaqarpunga immikkut ilisimasallit innuttaasuni tuniluunnerup siammarnissaanut isummernerat pingaarutiliusoq. Tuniluunneq siammaakkunnaamippat immikkoortut aallartikkiaarneqarsinnaalissapput,  Herman Berthelsen KNR-imut oqarpoq. 

AAMMA ATUARUK Marsimili siullerpaamik: Danmarkimi coronavirusimik toqquteqartoqanngitsoq

Ilaasa ammaqqinnissaa piaartumik pissasoq neriuutigaat. Tuniluunnermut kisitsisit qiviassagaanni soorlumi immikkoortoq 1 aallartissinnaalissasoq. Qaqugukkut ammarneq pissasoq naatsorsuutigineqarsinnaava? 

- Immikkortoq 1, piaartumik aallartissasoq neriulluarpugut, Hermann Berthelsen oqarpoq. 

Partiit isummissapput 

Demokraatit siulittaasorigallagaat, Nivi Olsen, avataaniit tikittunut ammaassinissaq toqqissisimaffigivaa. 

Kalaallit Nunaanni coronamut misissortinnissamut maleruagassat eqqaassissutigai, taakkuummatagooq nuanatsinni coronamik tunillatsissimasoqarpat paasiaarsinnaanerinut tuniluunnerullu siammatsaalinissaanut aqqutissatsialaat. 

- Naatsorsuuteqarluarpunga nunatsinni ammariartoqqinnissaq maannakkut pisinnaalissasoq, aningaasaqarnerput ulluinnarpullu aallarteqqinniassapput. 

 Hermann Berthelsen-ip pingaartippaa Inatsisartumi partiit tamarmik ammaassineqqinnermi suleqataassasut, atuuttussaq nunatsinnut tamanut naleqqunneruniassammat.

 - Neriulluarpugut partiit tamarmik tusaaneqassasut, tamatta naapeqatigiinnerussagatta, innuttaasunut pitsaaneq anguniarlugu, Hermann Berthelsen oqarpoq. 

 

 

 

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7797
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 25-at 2020 nal. 10:45