Marsimili siullerpaamik: Danmarkimi coronavirusimik toqquteqartoqanngitsoq

Napparsimmavinni uninngasut ullut sisamassaanik aamma ikileriaateqarput.
Danmarkimi inuit coronavirusimik tunillanneqarsimasutut nalunaarsorneqarnerminnit amerlanerpaamik ullut 30-t qaangiutereerneranni, nappaammut tassunga attuumassutilimmik toqquteqarsimasutut nalunaarsukkat maannamut 537-upput. Assi © : Scanpix
Allattoq Ritzau
maajip 15-at 2020 11:31
Nutserisoq Hanne Petersen

Danmarkimi coronavirusimut attuumassutilimmik ullup unnuallu ingerlaneranni toqquteqartoqanngilaq.

Naalagaaffiup nappaatinut akiuussutissaliorfiata, Statens Serum Institutip (SSI) kisitsisaataani tallimanngornermi saqqummertuni tamanna erserpoq.

SSI kisitsisinik nutartikkanik ullormut ataasiarluni saqqummiisarpoq, coronavirusimullu attuumassutilimmik marsip ulluisa 22-annili siullerpaamik toqquteqartoqarsimanngitsoq taakkunani erserpoq.

Ullormili tassani toqquteqartoqartoqarsimannginneratut paasisariaqanngilaq, SSI-mi nalunaarsuinermi kinguaattoorsinnaasarmat.

Danmarkimi inuit coronavirusimik tunillanneqarsimasutut nalunaarsorneqarnerminnit amerlanerpaamik ullut 30-t qaangiutereerneranni, nappaammut tassunga attuumassutilimmik toqquteqarsimasutut nalunaarsukkat maannamut 537-upput.

Napparsimmavinni uninngasut ullut sisamassaannik ikileriaateqarput. Danmarkimi inuit coronaviruseqarlutik  napparsimmavinni uninngasut maanna 137-upput. Taakkulu qulinik ikileriaateqarput. 

Inuit coronaviruseqarlutik peruluttut uninngavianniittut 32-upput, 26-llu anersaartuuteqartitaallutik.

Aamma peruluttut uninngavianniittut pingasunik anersaartuuteqartitaasullu marlunnik ikileriaateqarput.