Kinami 2019-imi decembarimi coronavirusimik tunillatsittoqarneranit virusi nunarsuup ilarujussuanut siaruaappoq, tamatumalu kingorna nunarsuarmut siaruaalluni - tunillatsissimasullu nunatsinni tunillatsissimasut maanna aqqaniliupput.
Tunillanneqarsimasunit sisimat maanna peqqisseqqissimapput.
Tunillanneqarsimasut aqqanillit tamarmik angerlarsimaffimminni mattuteqqapput. Tamarmillu Nuummi najugaqarlutik.
Nunat tamalaat peqqissutsimut suleqatigiiffiata (WHO) tuniluuttoqarnera nunarsuaq tamakkerlugu tunillaassuunnertut nalunaarutigaa.
Virusimik nutaamik nunavissuit assigiinngitsut akornanni tuniluussimagaangat nunarsuaq tamakkerlugu tunillaassuunnermik tamanna taaneqartarpoq. Nunarsuaq tamakkerlugu tunillaassuunneq piffissat ilaanni nunarsuarmut tamarmut siaruarsimasumik nappaalanermik aamma taaneqartarpoq.
Nunatsinni susoqarpa?
Nuuk:
Tunillatsissimasut nunatsinni aqqaniliupput. Taakkunannga sisamat peqqisseqqissimapput.
Tunillatsissimasut tamarmik Nuummi najugaqarput.
Nun.gl naapertorlugu apriilip ulluisa sisamaanni nalunaaqutaq 14:00 tikillugu inuit 625-t misissorneqarsimapput.
Tunillatsissimasoq ataaseq sumi tunillatsissimanersoq ilisimaneqanngilaq. Taamaammat illoqarfiit pingaarnersaanni upalungaarsimaneq pingasunngornermi, marsip 18-iani nalunaaqutaq sisamanit sukannersinneqarpoq.
Naalakkersuisut Nuummi, Kapisilinni Qeqertarsuatsiaanilu imigassamik nioqquteqarnerit tamarmik inerteqqutigilerpaat. Inerteqquteqarneq apriilip 15-iata tungaanut atuutissaaq.
Aaqqissuussinerit tamarmik inunnit qulinit amerlanerusunit peqataaffigineqartut Naalakkersuisunit apriilip arfineq-pingajuata tungaanut inerteqqutinngortinneqarput.
Nuummut assartuinerit - nioqqutissanik assartuinerit minillugit inerteqqutaalerput. Ilinniarfeqarfiit ulluuneranilu paaqqinniffiit matuneqarput, inuiaqatigiinnili upalungaarsimanermi immikkut suliaqartut meeraannut paarsisarfimmik pilersitsisoqassaaq.
Nuummi pisiniarfissuaq Nuuk Center, imerniartarfiit, timersortarfiit matumani timigissartarfiit ilanngullugit matuneqarput. Neriniartarfinniilli pisianit aggiussineq suli akuerisaavoq.
Inerteqqutit uku Nuummi kisimi atuupput, nunattalu sinneranut atuunnatik.
- Inuit amerlanerpaamik qulit ataatsimoorsinnaapput. Tamanna illup iluani silamilu atuuppoq. Tamanna maannamut 100-inut killeqarsimagaluarpoq.
- Ilinniarfeqarfiit ulluuneranilu paaqqinniffiit matupput. Atuarfiit tallimanngorpat aatsaat matusussaagaluarput – matusinerli ullumikkut sisamanit aallartissaaq.
- Nuuk Center matuvoq
- Qitigiartarfiit imerniartarfiillu matupput
- Neriniartarfiit aamma matoqqassapput. Taakkuli annissanik pisiniarfigineqarsinnaanissaat periarfissaassaaq.
- Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
- Pisiniarfiit ammaannassapput – pisinialli imminnut 2 meterinik ungasitsigisassapput
Nunatta sinnerani:
Nunarput sapaatini-akunnerni marlunni matuvoq.
Meeqqat atuarfiit marsip ulluisa 20-annit ulluni 14-ini apriilip arferngata tungaanut matoqqassapput. Meeqqat marsip ulluisa 20-anni angerlarunik atuariartoqqinngikkallassapput.
Tallimanngorneq marsip ulluisa 20-anni unnuaq-qeqqanit - atuarfiit matuppata - Air Greenlandip timmisartuutai aamma nunamiiginnalissapput.
Nunatsinnit nunatsinnullu timmisartuussinerit ulluni 14-ini unitsinneqassapput.
Illoqarfiit nunaqarfiillu akornanni aamma timmisartortoqarunnaassaaq.
Naalakkersuisut oqarsuaammik coronavirus pillugu apeqquteqartarfimmik pilersitsipput.
Innuttaasut oqarasuaammut 801100-imut sianersinnaapput, taannalu ulluinnarni nal. 08.00-imit 16.00-imut sianerfigineqarsinnaalluni.
Aamma apeqqutit corona@nanoq.gl-imut nassiunneqarsinnaapput.
AAMMA ATUARUK Najattaaq Thomsen coronavirusimik tunillatsissimanani tusarami: Qullilivunga paasigakku
Danskit ministeriunerata, Mette Frederiksenip Danmarkip nunanut allanut killeqarfini matugai tallimanngormat marsip 13-ianni unnukkut nalunaarutigaa, tamanna Islandimit nunatsinnut angalasoqarsinnaajunnaarneranik aamma kinguneqarpoq.
Danskisut innuttaassuseqartut nunatsinnut suli angalasinnaapput, matusisoqarneralu nunami allamiut pissutissaqavillutik nunatsinnut angalaniartut taamaallaat akuerineqarsinnaanerannik isumaqarpoq. Takornariaqarneq assigisaalu siunertarineqarsinnaanngillat, Islandimiilli nunanillu allaniit suli assartuisoqarsinnaavoq.
Oqartussat matumani qanoq oqarpat?
Tunillaassortunik nappaalasoqarneranut ataatsimiititaliarsuup Nuuk minillugu uku innersuussutigaa:
- aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
- nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq.
- illoqarfinni bussit ilaasunik ulikkaaveqqusaanngillat.
- timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat.
- inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.
- inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.
Mittarfinni nakkutigineqartarpat?
Nunatsinnukarlutik angalasut coronavirusimut atatillugu nakkutigineqarnissaannik pilersaaruteqanngilaq.
Angalasut tunillatsissimasorigunik namminneerlutik peqqinnissaqarfimmut saaffiginnissapput.
Ersiutit suuppat?
Coronavirusimik tunillatsissimasut assigiinngitsorpassuarnik ersiuteqarsinnaapput, taakku sakkukitsuusinnaallutillu sakkortuumik malugineqarsinnaapput:
Nakorsaaneqarfiup nittartagaatigut annerusumik atuagaqarit
Coronavirus qanoq tuniluuttarpa?
Tuniluunneq inummiit inummut tuniluuttuuvoq. Nuak tangajornikkut quersornikkullu tuniluunnerusarpoq
Virusimik tunillaassuinaveersaarnissamut innersuussutit aaku:
- Asalluartarneq ajornanngippat asareernermi assaallu panerneranni assanut tunillannartuiaat atorlugu eqqiluisaarluarneq
- Inuit nuattut/toqqusaarluttut qanillinaveersaarneri
- Kakkissarfimmut ataasiartakkamut ikutsilluunniit peqiffianut quersorlutillu tangajortarit
- Kuniuinak, eqitaarinak assammiinallu.
Tunillatsissimasoriguma qanoq iliussaanga?
Nammineerlutit napparsimmavimmut peqqissaavimmulluunniit ornigutinnginnissat pingaaruteqarpoq. Allanut tunillaaratarsinnaavutit.
Sianerlutit piffissamik isumaqatigiissuteqaqqaassaatit. Napparsimmaviit peqqissaaviillu allattorsimaffia aana:
Sumiiffik Ammanerani oqarasuaat nal. 16.00 kingorna
Aasiaat 89 22 11 89 22 11
Ilulissat 94 32 11 94 32 11
Ittoqqortoormiit 99 10 11 59 93 21
Kangaatsiaq 89 43 00 89 22 11
Maniitsoq 81 32 11 81 32 11
Nanortalik 61 32 11 61 32 11
Narsaq 66 12 11 66 12 11
Nuuk 34 44 00 34 44 00
Paamiut 68 12 11 68 12 11
Qaqortoq 64 22 11 64 22 11
Qasigiannguit 91 12 11 89 22 11
Qeqertarsuaq 92 12 11 89 22 11
Qaanaaq 97 10 11 94 32 11
Sisimiut 86 42 11 86 42 11
Tasiilaq 98 12 11 98 12 11
Upernavik 96 12 11 96 12 11
Uummannaq 95 12 11 95 12 11
Danmarkimi pissutsit qanoq ippat?
Danmarkimi pissutsit ineriartuinnavipput.
Inuit 3672-it apriilip ulluisa pingajuanni tunillatsissimasutut nalunaarsoqqapput.
139-t toqupput.
Ministeriunerup suliniutit sukannersorujussuit saqqummiuppai:
Daskit killeqarfiit matuneqarallarput.
Danskisut innuttaassuseqartut killeqarfikkut suli ikaarsinnaapput, aamma nioqqutissanik nakorsaatinillu assartuisoqarsinnaavoq.
Matusisoqarnerata malitsigisaanik killeqarfinni nakkutilliisoqalerpoq. Tamanna arfininngornermiit poorskip kingornanut tassa apriilip 13-ianut atuutissaaq.
Danskit naalakkersuisuisa aaqqissuussinerit qulinit amerlanerusunit peqataaffigineqartussat inerteqqutaalerput.
Pisortat atuarfeqarfii ulluuneranilu paaqqinniffii tamarmik matupput, atuartut ilinniartullu ilinniarfinni tamaneersut angerlartinneqarput.
Pisortat meeqqat atuarfii paaqqinniffiillu apriilip 16-ata tungaanut matoqqassapput.
Tamanna pissutigalugu kalaallit ilinniartut efterskolinilu atuartut atuariartorsinnaanngillat.
Nunatsinni ilaqutariit Danmarkimi efterskolini atuaruuteqartut angerlartitsiniarunik Kalaallit Illuinnut saaffiginnissapput. Namminersorlutik Oqartussat Danmarkimit nunatsinnut angalanermut akiliissapput.
Kalaallit Danmarkimi efterskolertut 233-upput.
Nunarsuup sinnerani coronap ajornartorsiutaanera qanoq ippa?
Iserfissamit uannga nunarsuarmi tunillatsissimasut qassiunersut qassillu toqusimanersut malinnaaffigisinnaavat.
Sumut angalassanngilit?
• Kina: Nunap immikkoortua Hubei
• Italia: Nuna tamarmi pingaartumik nunap immikkoortui Piemonte, Lombardiet, Emilia-Romagna, Aostadalen, Veneto aamma Marche
• Iran: Nuna tamarmi
• Korea Kujalleq: Nuna tamarmi, pingaartumik illoqarfik Daegu nunallu immikkoortua Gyeongbuk
• Østrig: Nunap immikkoortua Tyrol
• Spania: Madrid, La Rioja kiisalu Spaniap Avannaani nunap immikkoortua Baskerlandet
Nunanut allanut tunngasunut ministereqarfiup ukununnga pisariaqanngitsumik angalasoqaqqunngilaa
• Nunarsuup sinnera
Kilder: Tunillaassortunik nappaalasoqarneranut ataatsimiititaliarsuaq aamma Nunanut allanut tunngasunut ministereqarfik
Isummersuutit