Nunatsinnut angalassavit? Nunatsinnut isernissamut malittarisassat nutaat atuutilersut
Nunatsinnut angalanermut malittarisassat nutaat ullumi marlunngornermi atuutilersinneqarput.
Nunatsinnut angalaniaruit nunatsinnilu najugaqanngikkuit Københavnip mittarfianit timmisartumut ikitinnak tamakkiisumik akiuussuserneqariissaatit.
Nunatsinnut Københavnimit taamaallaat angalasoqarsinnaavoq.
Nunatsinnut angalasut tamarmik aallannginnerminni coronamik tunillatsissimannginnermut uppernarsaammik, sivisunerpaamik akunnernik 48-nik pisoqaassusilimmik takutitseqqaartussaasaraluarput – tamannali nunatsinni najugaqanngitsunut naammakkunnaarpoq: Tassa angalaniartut tamakkiisumik akiuussuserneqarsimanerminnik uppernarsaateqaqqaarlutik tikissinnaalerput.
AAMMA ATUARUK Tamaat isigalugu: Coronavirus pillugu killiffik
Tamanna inunnut 18-ileereersimasunut atuuppoq. Angalaniartullu tamarmik timmisartumut ikinissaminnut coronamik tunillatsissimannginnermut suli uppernarsaateqaqqaartassapput.
Meeqqat marlunniit 17-inut ukiullit coronamik tunillatssimannginnermut uppernarsaateqaannassapput.
Nunatsinni najugaqaruit
Nunatsinni najugaqaruit timmisartumut ikinissannut najukkamut uppernarsaammik kiisalu coronamik tunillatsissimannginnermut uppernarsaammik takutitsissaatit.
Namminersorlutik Oqartussat oqarnerat naapertorlugu nunatsinni najugaqartut tassaapput nunatsinni aalajangersimasumik najugaqartut. Nunatsinnut nuuttut nunatsinniluunniit piffissami sivisuumi sulisussat taakkununnga aamma ilaapput.
Tunillatsissimasumut qanillisimanerit pissutigalugu tunillatsissimasinnaasutit oqartussanit paasissutissiiffigineqarsimaguit nunatsinnut angalatinnak tunillatsissimannginnermut MARLORIARLUTIT uppernarsaateqaqqaarlutit Air Greenlandip timmisartuutaanut ikisinnaavutit.
Misissortinneq siulleq tunillatsissimasumut qanillisimanermit ullut sisamat qaangiunnerani misissortinnerussaaq, misissortinnerullu aappaa misissortinnerup siulliup kingorna ullut marluk qaangiunnerani misissortinnerussalluni.
Angalanissamullu Immersugassaq-Sumut immersorneqarnissaa eqqaamaneqassaaq.
Nunatsinnut tikinnermit ullut tallimassaanni misissortittoqassava?
12-ileereersimagaanni mittarfimmi timmisartumilu qanermut kiinnamulluunniit assiaquteqarnissaq eqqaamaneqassaaq.
Qanermut kiinnamulluunniit assiaquteqarnissamut piumasaqaat annikitsumik ilisimassutsilinnut, timikkut tarnikkulluunniit sanngiitsunut, allamilluunniit peqquteqartunut atuisinnaanngitsunut atuutinngilaq.
AAMMA ATUARUK Sisimiuni inuit marluk napparsimmavimmut unittut tuniluuttoqangaatsiartorlu
Piumasaqaaterpassuit taakku aqqusaareerlugit kiisami Kalaallit Nunaannut angerlarluni tikikkaanni tamakkiisumillu akiuussuserneqarsimanani taava suli eqqaamasassaqarpoq:
Tikinnernit ullut tallimat qaangiunneranni misissortinnermit tunillatsissimannginneq uppernarsarneqartinnagu katerinnernut, aaqqissuussinernut pisunulluunniit allanut peqataaqqusaanngilatit.
Matumani illup iluani silamilu pisut, pisortat inuillu katerittarnerat, aaqqissuussinerit pisussallu ilaatinneqarput. Misissortikkiartorlunili aninissaq inerteqqutaanngilaq.
Meeqqat marluk inorlugit ukioqartut misissortittariaqanngillat.
Tunillatsinnikuusimasunut immikkut malittarisassat
Coronamik tunillatsinnikuusimasunut immikkut ittunik maanna aamma malittarisassaqalerpoq.
Aallannginninnit sivikinnerpaamik ullunik 14-inik pisoqaassusilimmik annerpaamillu sapaatit akunnerinik aqqaneq-marlunnik pisoqaassusilimmik PCR-imik misissortinnermi tunillatsissimanerup uppernarsarneqarnera takutissinnaavat.
Tamanna uppernarsaatigineqarpat tamakkiissumik akiuussuserneqarsimasutut taanna isigineqassaaq.
Corona pillugu malittarisassat nutaat aggustip ulluisa 24-at ilanngullugu atuutissapput.