Sisimiuni inuit marluk napparsimmavimmut unittut tuniluuttoqangaatsiartorlu

Nunatsinni illoqarfinni inuttunerpaap tullia covid-19-imik tuniluuffiulluni eqqornerlunneqaqqavoq.

Napparsimasut nutaat arfineq-pingasut arfininngornermi nalunaarsorneqartut tamarmik tunillatsiffii tuniluuffiit ilisimaneqareersut avataanneersuupput.

Tuniluunneq suliffeqarfinni sullissivinnilu arlalinni aammalu napparsimmavimmi pivoq.

Allatut oqaatigalugu Sisimiuni aqunneqarsinnaanngitsumik tunillaassuuttoqartoq, Naalakkersuisut tusagassiuutinut nalunaarput itisiliillutillu:

- Tamanna maannamut Kalaallit Nunaanni Covid-19-ip tuniluunnerani tunillatsissimasut amerlanerpaaffigaat annertunersaallunilu, Naalakkersuisut allapput.

Marluk napparsimmavimmut unitsinneqartut

Taassuma saniatigut inuit marluk Sisimiuni napparsimmavimmut unitsinneqarput taassuma aappaa isumagineqarnissaminik pisariaqartitsivoq. KNR Nunatsinni Nakorsaaneqarfimmut attaveqarpoq, taakkuali napparsimmavimmi uninngasut peqqissusaat inuttut inuunerat illersorniarlugit itisilerusunngilaat.

Naalakkersuisut malillugit akiuussutissamik tamakkiisumik kapitissimanngitsut nappaammik siaruaanerpaapput.

AAMMA ATUARUK Tunillatsittut aatsaat taama amerlartigileqqittut

- Tunillatsissimasut amerlanersaat kapitissimanngillat imaluunniit ataasiaannarlutik kapitissimallutik. Pingaartumik inuusunnerusut tunillatsittarput, taamaalillutillu tuniluunnermik ingerlatitsisuullutik.

AAMMA ATUARUK Sisimiuni meeqqat atualernissaat kinguartinneqartoq

Misissuisarfimmik ammaarusuttut

Pisortat Sisimiuni misissuivimmik ammaanissartik maanna tamaviaarullugu sulissutigaat. Tuniluunnermi iliuuseqarnerunnginnikkut unitsinneqarsinnaanngitsutut nalilerneqarpoq.

- Taamaattumik Qeqqata Kommunia suleqatigalugu Sisimiuni misissuisarfimmik pilersitsisoqarnialerpoq. Kommuni atortussanik sulisussanillu atugassiinissaminik neqerooruteqarpoq.

Qeqqata Kommunia Sisimiuni meeqqat atuarfiini marlunni atuarnerup aallartinnissaa sapaatit akunneranik ataatsimik kinguartillugu ullumi nalunaarpoq, tuniluunnerup siaruaatinnginnerunissaa tassani anguniarneqarpoq.

Nunarput tamakkerlugu covid-19-imik napparsimasut maanna 67-upput aatsaat taamak amerlatigalutik.