Sisimiuni meeqqat atualernissaat kinguartinneqartoq
Sisimiuni meeqqat atuarfianni Minngortuunnguup atuarfiani Nalunnguarfiullu atuarfiani ukiumi atuarfiusumi atualerneq sapaatit akunneranik ataatsimik, tassa ataasinngorneq aggutsip 16-ani pisussanngorlugu kinguartinneqartoq, Qeqqata Kommunia tusagassiuutinut nalunaarpoq.
- Tamanna Sisimiuni covid-19-imik tunillatsittut amerligaluttuinnarnerinik aallaaveqarpoq, Qeqqata Kommuniani borgmester, Malik Berthelsen oqarpoq.
Qeqqata Kommunia corona virusimik ullup unnuallu kingulliup iluani tuniluuffiunerpaasoq, kisitsisit Nunatsinni Nakorsaaneqarfimmeersut takutippaat. Kommunimimi tassani tunillatsissimasutut nalunaarsorneqartut arfininngornermi 22-pput.
- Takutereerparput mianersornitsigut tuniluunneq siammatsaaliorsinnaallutigu. Taamaattumik kaammattuutigerusuppara, uani pisumi ilungersunartumi tamatta ikioqatigiilluta innersuussutit malinnerisigut covid-19 siammatsaaliussagipput, Malik Berthelsen oqarpoq.
Taassuma qanermut assiaquteqarnissaq, inuit allat qanillinaveersaarnissaat, assaat asakulanissaat nappaammullu ersiuteqarnermi angerlarsimaannarnissaq kaammattuutigai.