Arfeqatigiit imminnut ungasikkaluarlutik ataqatigiissumik ingerlaartartut
Arfiviit immami aaqqissuussaasumik aqqartarnersut takujuminaassinnaasarpoq, aalajangersimasumik aqqartarnersut aamma takujuminaassinnaalluni.
Pinngortitaleriffiup tamanna misissueqataaffigisimavaa.
Naallu arfiviit aalajangersimasumik pissuseqarnersut paasiuminaassinnaagaluartoq aaqqissuussaasumik aqqartarunartut maanna paasinarsivoq, allaallumi 100 kilometeritut imminnut ungasitsigigaluarlutik aaqqissuussaasumik aqqartartut paasineqarluni.
Arfiviit uuttortaatilersorlugit malinnaavigineqartut
Arfiviit aqqaneq-marluk qanoq ititigisumut aqqartarnersut paasisaqarfigerusullugit sekundit tamaasa nalunaartartunik uuttortaatilersorneqarsimapput.
Arfivinnik ukiuni 2008-miit 2019-imut upernaat tamaasa Qeqertarsuup Tunuani misissuisoqartarsimavoq, arfiviillu katillugit ulluni 144-ni aqqartarneri misissorneqarsimallutik.
Arfiviit aqqartarnerisa aaliangersimasumik pissuseqarnerinut takussutissaq siulleq tassaavoq, ullup unnuallu nikittarnerat malimmassuk, ualinerani aqqarneqqortusisarlutik. Arfiviit nerisannaamik illeqqat itissutsini assigiinngitsuni nikittarnerat aqqarujussuartarnerminnut nalimmassarsimavaat, illeqqammi ualikkut immap itinerusuanut pisarmata.
Imminnut ungasikkaluarlutik ataatsikkut aqqartartut
Uissuumminarneruvorli arfiviit marluk ataatsikkut aqqartarsimammata, naak imminnut ungasikkaluaqalutik. Arferit taakkua marluk ilaanni 5 kilometeritut allaalluunniit 100 kilometeritut ungasitsigalutik, sapaatip akunnera pallillugu ataatsikkoqqissaaq aqqaqatigiittarsimapput.
Arferit imminnut 100 kilometerisut ungasitsigalutik nipi qatitooq atorlugu attaveqatigiissinnaasarpasipput.
Arfiviit ataatsikkut aqqaamasarnerat tupinnartuliaavoq, aammali pinngortitami nassuiaruminaatsunik takujuminaatsunillu naapitsisoqartarneranut takutitsisuulluni. Pinngortitaleriffik tusagassiorfinnut nalunaarummi taama allappoq.
