Pinngortitaleriffiup pisortaa Rinkimik nersornaaserneqartoq

Danmarkimi Det Grønlandske Selskabip pinngortitaleriffiup pisortaa, Klaus Nygaard Rinkimik nersornaaserpaa.

Rinkimik nersornaasiisarneq nunatsinni ilisimatuutut misissuinermi immikkut ittumik tapersiisimasumut inuiaqatigiinnulluunniit kalaallinut arlaatigut pingaaruteqartumik suliniuteqarsimasumut tunniunneqartarpoq.

Klaus Nygaardilu taamaaliorsimasoq Det Grønlandske Selskabip siulittaasuata, Johnny Fredericiap nersornaammik tunniussinermini oqaatigaa.

- Pilersitsivutit ilisimaareqqissaarlugu ilisimatusarnerup pitsaassuseqarnissaata aammalu soqutigisanut arlaannaannulluunniit attuumassuteqanngitsumik ingerlanneqartarnissaata pingaarutaanik, tamannaannaanngitsorlu aammalu ilisimatusarnerup inuiaqatigiinnit avatangiiserisanit atorneqarsinnaasuunissaanik qulakkeerinninnissap pingaarutaanik paasinnillutit, Johnny Fredericia oqarpoq.

- Illit inuussutissarsiortunit naalakkersuinikkullu suliaqartunit siunnersuisarnissinnik tapersersorneqalerneq akuerinninnerlu pilersissimavatit, naak pisassiissutigineqarsinnaasutut siunnersuutigisartakkasi qaqutiguinnaq nuannaarutigineqartaraluartut, nangilluni oqarpoq.

Taamaalilluni Klaus Nygaard nersornaaserneqarsimasut inuit nuimasut Kalaallit Nunaatalu oqaluttuarisaaneranut pingaaruteqarsimasut akornanni allassimalerpoq.

Rinkip nersornaataanik nersornaaserneqarsimasut ilaatigut makkuupput: Robert Petersen, Minik Rosing, Lauge Kock, Ejner Mikkelsen, Eigil Knuth, Frederik Nielsen, Sara Helms, Christian Berthelsen, Jens Rosing, Christian Vibe, Jens Dahl aammalu Helge Larsen.

Hinrich Johannes Rink danskiuvoq nunanik ilisimatusartoq, ujarassiooq nunarpullu pillugu ilisimatusartoq, taanna 1848-mi nunatsinnukarpoq, nunattalu ineriartorneranut pingaaruteqangaatsialerluni.