Savalimmiuniit Tunumut: Suliniut nutaap arferit ingerlaarnerat takutippaa
![](/sites/default/files/styles/image_934x467/public/article_images/aarlut.png?itok=gcfu8i2c)
Pinngortitaleriffik, Island Savalimmiullu suleqatigiillutik septembarip ulluisa pingajuanni 2022-mi, aarluarsuit sisamat qaammataasanut nassitsisulersorpaat, tamanna Savalimmiuni kangerliumanermi pivoq.
Fernando Ugarte, Pinngortitaleriffimmi immikkoortortami pisortaq taama oqaluttuarpoq.
- Arferit pinngortitami ataqatigiinnermi salliupput. Aalisagartortarput, aalisakkallu uumasuaqqat immap ikerinnaanniittut nerisarivaat, namminerli nerineqartarnatik.
-Arferillu uumalluarpata, tassa nerisariit uumalluarpata, pinngortitami ataqatigiinneq ajunngitsuusoq isumaqarpugut, Fernando Ugarte, Pinngortitaleriffimmeersoq, KNR-imut oqarpoq
Aarluarsuit sisamat pernaammik qaammataasanut nassitsisulersorneqareerlutik tupaallaatigineqartumik tamarmik sumiiffinnut assigiinngitsumut ingerlaalerput
Sapaatip akunnera ataaseq qaangiuttoq, qaammataasanut nassitsissutit marluk annaaneqarsimasut, Pinngortitaleriffik tusagassiutitigut nalunaaruteqarpoq.
Paasisat nutaat tupaallatsitsipput
Aarluarsuup kimmut aallartup qaammatip ataatsip qaangiunnerani, Tunumi nunatta imartaa itisileriarfianiilersimavoq. Aarluarsullu alla, aamma nunatta tunuata imartaanut ingerlaarpasittoq, Pinngortitaleriffik nalunaarpoq.
- Tupigutsaqaagut. Qaammataasatigut nassitsissutit siulliit aallaavigalugit aarluarsuit Savalimmiuniit Islandimut Tunumullu ingerlaartartut paasivarput. Uumassusillillu taakku nunat pingasut taakku akornanni ingerlaartartut paasivarput. Pissanganaqaaq, Fernando Ugarte oqarpoq.
-Aarluarsuit, niisarnaat aarluillu suliniummi qitiutinneqarput, arferimmi taakku pingasut piniagaapput. Arferillu taakku uumanerat pillugu paasissutissanik sapinngisamik amerlanerusunik pissarsisoqarnissaa taamaammat pingaaruteqarpoq
Savalimmiut Kalaallit Nunaatalu akornanni imartaq pillugu ilisimasat annikitsuinnaasut Fernando Ugarte aamma oqarpoq.
Pisassiissutinut toqqaannartumik sunniuteqarnavianngitsut
Tunulli avataani imartap ukiuni kingullerni 15-ini allanngoriartornerata kingunerisaanik uumassusillit allanngoriartornerannik aamma malitseqarpoq, uumasummi piniarneqarsinnaasut tamaani siornatigut takuneqarsimanngitsut takussaalersimammata.
- Arferit taakku Savalimmiuni Kalaallit Nunaannilu pingaaruteqarput. Taakkualu pillugit paasissutissat pissarsiarisariaqarpagut. Paasissutissat taakku pisassiissutinut toqqaannartumik sunniuteqarnavianngillat, piniagaaneranulli naliliisarnermut ilaatinneqartassallutik, Fernando Ugarte, Pinngortitaleriffimmi immikkoortortami pisortaq KNR-imut oqarpoq.
Suliniut TOPLINK-imik taaneqarpoq, tassani Pinngortitaleriffik Savalimmiullu immamut tunngatillugu ilisimatusarlutik suleqatigiissutigaat. Savalimmiunilu siunnersoqatigiit suliniummut aningaasaliisuullutik.
Aarluarsuit ingerlaarnerat ugguuna malinnaavigineqarsinnaavoq