Nuuk Water Taxi arferit qassutinukannginnissaannut KNAPK-mut ikiuuttoq
Nuuk Water Taxi aamma KNAPK ilimagineqanngitsumik suleqatigiinnissamik isumaqatigiissuteqarput. Qipoqqallu suliffeqarfiup kattuffiullu suleqatigiinnissaannut pissutaapput.
Nuuk Water Taxi KNAPK-mi ilaasortanut 50-inut Whalepingersinik tapersiissuteqarniarluni aalajangerpoq.
Whalepingers atortorissaarutaapput bundgarninut ikkunneqartartut taakkulu imaani maligaasat atorlugit arferit kisimik tusaasinnaasaannik nassitsisarput, arferillu taamaalillutik bundgarninit tatamisinneqartarlutik.
- Upernaap ingerlanerani arfernut tatamisaarutit tunissutiginiarlugit aalajangerpugut, takulluarsinnaagatsigu ajornartorsiut illuatungeriinnut atuuttoq. KNAPK saaffigaarput, aamma qujanartumik paasinnilluarput aammalu pitsaasumik suleqatigiinnissamik tassanngaanniit kissaateqartoqarpoq, Nuuk Water Taximit Anders Lykke Laursen tusagassiuutinut nalunaarummi oqarpoq.
Toqusarlutillu aserorterisartut
Qipoqqat aalisartut bundgarniinukartarnerat ukiuni arlalinni ajornartorsiutaavoq. Taamaalioraangatami arferit toqusarput aalisartullu atortorissaarutaat aserorneqartarlutik.
Tamannali atortorissaarutip Whalepingersip allannguiffigeqataaffigisinnaavaa.
Arfernut tatamisaarutit 50-it KNAPK-p immikkoortortaqarfiinut Sisimiuniit Paamiut ilanngullugu siaruarterneqarput, tassanilu aallaqqaammut aalisartunut, bundgarnit atorlugit, saarullinniartunut tunniunneqarlutik.
Maannalu – aalisartut atortorissaarummik pissarsinerannit qaammatialuit qaangiuttut – tamanna sunniuteqarluartoq takuneqarsinnaavoq.
Sunniuteqarluarneq siaruaattoq
Imaani sunniuteqarluarnerat siaruaappoq – aamma aalisarnermik inuussutissarsiornerup avataani.
Whalepingersimmi atornerisigut qipoqqat bundgarninukartut ikinnerunerannik kinguneqarpoq. Aalisartut taamaalillutik atortorissaarutaat aserorterneqaratik, bundgarninukannginnerunerallu takornariaqarnermik inuussutissarsiuteqartunut, arfernik takornariartitsisartunut aamma nuannaarutigineqartumik sunniuteqarluarpoq.
KNAPK-p siulittaasua Nikkulaat Jeremiassenip tamanna oqaatigaa.
- Nuuk Water Taxi A/S-imiit tunissuteqartoqarnera KNAPK-miit ilassilluarparput, aammalu iliuuseqarneq tukkunertut isigineqartariaqarpoq. Qipoqqat saarullinnianut annertuumik ajoqutaasarput, taakku bundgarnii aserorterneqartarmata, taanna oqarpoq, nangillunilu:
- Aalisarnermi atortut annaasat akisoorujussuusarput, ingammik bundgarnit eqqarsaatigalugit. Aalisartut isertitamikkut kisimi annaasaqarneq ajorput, tassami atortut akisoorujussuit annaaneqartarmata, tassami taakku allaat 20.000 koruunit sinnerlugit akeqarsinnaasarmata.
