KNAPK qipoqqaat eqqissisimatinneqarnissaat pillugu: Aalisartunik nikassaaneruvoq
Kommuneqarfik Sermersuumi kommunalbestyrelsit Nuup Kangerluani qipoqqaat eqqissisimatitaalernissaannut siunnersuut atulersinniarlugu marsip ulluisa aappaanni aalajangerpaat.
Qipoqqaat eqqissisimatitaalernissaannut aajangiineq Inuit Ataqatigiinnit, Demokratinit kommunalbestyrelsimullu ilaasortamit, Michael Rosingimit amerlanerussuteqarfigineqartoq Siumumit siunnersuut akerlilerneqarpoq. Michael Rosing siunnersuuteqartuuvoq.
AAMMA ATUARUK Siunnersuut akueraat: Qipoqqaat Nuup Kangerluaniittut eqqissisimatinneqassapput
Nuup Kangerluani qipoqqanik isiginnaarsinnaanissaq ajornannginnerusariaqartoq kommunalbestyrelsit isumaqarput. Tamanna piniartut kangerlummi qipoqqannik piniaqqusaannginnissaannik aamma isumaqarpoq.
KNAPK-p siulittaasua, Henrik Sandgreen eqqissisimatitsisoqalerneranut maanna qisuariarpoq. Naatsumik oqaatigalugu taassuma kommunip aalajangernera isumaqatiginngilaa.
- Taamak misilittagakippalaartigisumik kommune taama angitisoq iliornera pakatsissutigisorujussuuara, siulittaasoq oqarpoq.
Henrik Sandgreen: Piniartunik nikassaaneruvoq
Aalisartut piniutiminnik illersuiniarlutik Nuup Kangerluani qipoqqanik aallaasaqartartut KNAPK-p siulittaasuata oqaatigaa.
Kommunalbestyrelsit qipoqqaat Nuup Kangerluani eqqissisimatitaalernissaannut ilaatigut ukioq manna bundgarnersorlutik aalisartussanik qinnuteqartoqarsimannginnera tunngavilersuutigaat.
- Oqallinnermi ilaatigut avammut annineqaqattaarpoq soorlulusooq bundgarnersornermi Nuup Kangerluani ingerlataqartoqarpiarsimanngitsoq. Oqartariaqarpunga taama ataqatigiinngitsigisumik avammut saqqummiussuineq isumaqarpunga aalisartunik aamma nikassaanerusoq, Henrik Sandgreen oqarpoq.
Kommuneqarfik Sermersuup Nuup Kangerluani qipoqqanik eqqissisimatitsilernissaq kinguartittariaqaraa KNAPK-p siulittaasua isumaqarpoq.
- Paasisat tunngavigalugit isumaqarpunga Kommuneqarfik Sermersuup taamatut iliorsimaneq qinersereernissap tungaanut kinguartiinnartariaqaraat. Taavalu nutaamik suliareqqittariaqarlugu, Henrik Sandgreen oqarpoq.
Nuup Kangerluani qipoqqaat markuk ukiut tallimat kingulliit ingerlaneranni pisarineqarput.
Sumiiffimmi peqatigiiffik ernumasoq
Siunnersuut kommunalbestyrelsimit akuerineqaqqammersoq Namminersorlutik Oqartussanut nalunaarutigineqartussatut ingerlateqqinneqassasoq, Kommuneqarfik Sermersooq ilisimatitsivoq. Ingerlateqqitarli Namminersorlutik Oqartussanit suli tiguneqarsimanngitsoq, Aalisarnermut Piniarnermullu Naalakkersuisoqarfiup KNR-imut paasissutissiissutigaa. Malittarisassaq qaqugu atuutilissanersoq taamaammat suli ilisimaneqanngilaq.
Siunnersuutip tusarniaassutigineqarnerata nalaani tusarniaanermut akissutit 27-t nassiunneqarput. Akissutinit 26-nit siunnersuut isumaqatigineqarpoq, NAPP-lu siunnersuummut akerliusutuaalluni.
AAMMA ATUARUK Qipoqqarniaqqusaajunnaarneq takornarialerisut piniartullu akerleriissutigaat
NAPP isumaqarpoq qipoqqat Nuup Kangerluanut pulagaangamik nuna sineqqissaarlugu nerisassarsiorlutik ingerlasartut taamaalillutillu aalisartut aalisarfigisartagaanni aserorterisarlutik, nerisassatillu malillugit ingerlaaraangamik bundgarnit aqqusaalutorisaraaat aserorlugillu.
Qipoqqaat Nuup Kangerluaniittut Nuullu qanittuani Kangerup, Kitsissut, Angisunnguup Aqissersiorfiullu akornanniittut eqqissisimatinneqalerput. Nunap assinga uani ataani takuuk
Qipoqqaat kangerluup avataani suli piniarneqarsinnaapput.
Nuup Kangerluani qipoqqanik eqqissisimatitsiffiusussatut pilersaarutip assiliartaa.