Siunnersuut akueraat: Qipoqqaat Nuup Kangerluaniittut eqqissisimatinneqassapput
![](/sites/default/files/styles/image_934x467/public/user_pictures/MartensSoerenNuuk__arfeq06.jpg?itok=9f1zJCRX)
Qipoqqaat Nuup Kangerluaniittut eqqissisimatinneqassasut, Kommuneqarfik Sermersooq aalajangerpoq. Kommunalbestyrelsimmi tamanna marlunngornermi akueraa.
Tassa imaappoq, qipoqqaat Nuup Kangerluaniittut alutorsaatiginissaat ajornannginnerulissallunilu Nuup Kangerluani qipoqqarniartoqaqqusaajunnaarpoq.
AAMMA ATUARUK Siunnersuut: Qipoqqaat Nuup Kangerluarniittut piniarnagit takusassiaallik
Qipoqqarsuit Nuup Kangerluaniittut eqqissimatinneqalerpata innuttaasut takornariallu tamakkuninnga siumugaqakulanissaannut iluaqutaaqataallunilu Nuummi 2023-mi mittarfissuaqalereeriarpat takornariaqarnerulissasoq siunnersuusiortut naatsorsuutigalugu tunngavilersuipput.
Qipoqqaat Nuup Kangerluaniiittut Nuullu qanittuani Kangerup, Kitsissut, Angisunnguup Aqissersiorfiullu akornanniittut eqqissisimatinneqalissasut siunnersuutaavoq. Immap assinga ataani takuuk.
Nuup Kangerluatali avataani suli qipoqqarniartoqarsinnaavoq.
![](/sites/default/files/styles/image_934x467/public/0001.jpg?itok=c891Mgq6)
Immap, Nuup Kangerluani qipoqqarniarfiusarunnaartussatut pilersaarutigineqartup, assinga.
Kommunalbestyrelsip tamanna sapaatit akunnerini sisamani tusarniaassutigereerlugu marlunngornermi akueraa.
Qipoqqaat eqqissisimatinneqalernissaannut siunnersuut Inuit Ataqatigiinnit Demokraatinillu amerlanerussuteqartunit kommunalbestyrelsimilu ilaasortamit Michael Rosingimit akuerineqartoq, Siumup akerleraa.
Tamanna pillugu aningaasatigut nalimmassaanissaq paasissutissallu amigarmata, tamanna qinigaaffiup tulliani sammineqartariaqartoq, Siumut isumaqarpoq.
Piffissami tusarniaaffiusumi akissuteqaatit 27-upput, taakkunannga 26-t akuersillutik. Nuummi Aalisartut Piniartullu Peqatigiiffiat NAPP siunnersuummut akerliusutuaavoq.
Siunnersuut kommunalbestyrelsimit akuerineqaqqammertoq nalunaarutigineqartussatut Namminersorlutik Oqartussanut ingerlateqqinneqassasoq, Kommuneqarfik Sermersooq ilisimatitsivoq.