Siunnersuut: Qipoqqaat Nuup Kangerluarniittut piniarnagit takusassiaallik

Qipoqqaat Nuup Kangerluaniittut alutorsaatiginissaat ajornannginnerusariaqarpoq.

Siunnersuummi Kommuneqarfik Sermersuup kommunalbestyrelsianit akuerisami tusarniaassutigineqaleruttortumilu taama allaqqavoq.

Nuup Kangerluani qipoqqarniartoqartarunnaassasoq tamaanilu qipooqqaat eqqissisimatinneqalissasut siunnersuutaavoq. 

Qipoqqarsuit Nuup Kangerluani eqqissimatinneqalerpata innuttaasut takornariallu tamakkuninnga siumugaqakulanissaannut iluaqutaaqataallunilu Nuummi 2023-mi mittarfissuaqalereeriarpat takornariaqarnerulissasoq siunnersuusiortut naatsorsuutigalugu tunngavilersuipput.

Suli qipoqqarniartoqarsinnaasoq

Qipoqqaat Nuup Kangerluaniiittut Nuullu qanittuani Kangerup, Kitsissut, Angisunnguup Aqissersiorfiullu akornanniittut eqqissisimatinneqalissasut siunnersuutaavoq. Immap assinga ataani takuuk.

Nuup Kangerluatali avataani suli qipoqqarniartoqarsinnaasoq, kommunip tusarniaammut saqqummiussamini erseqqissarpaa.

- Kangerluup avataani suli qipoqqarniartoqarsinnaammat, inuussutissarsiutigalugu piniartunut ileqqoreqqusap sunniuteqarnerunissaa naatsorsuutigineqanngilaq, aningaasatigullu taarsiissuteqartoqarnissaanik pisariaqartitsisoqanngitsoq aamma nalilerneqarpoq.

Assi © : Kommuneqarfik Sermersooq

Immap, Nuup Kangerluani qipoqqarniarfiusarunnaartussatut pilersaarutigineqartup, assinga.

Siunnersuut taanna pinngortitaq pillugu nunarsuaq tamakkerlugu suliniaqatigiiffiup WWF-ip qujaruppaa. Avataata qipoqqai aarlerinartorsiortitaanngitsut, WWF-ip nunatsinni immikkoortoqarfianeersoq Kaare Winther Hansen erseqqissaavoq, nangillunili:

- Nuup Kangerlua qipoqqakillivoq. Qipoqqaat arfinillit Nuup Kangerluanut uteqqiattuusimasut sarpiisigut ilisarisartakkavut, Nuup Kangerluani assilisat affaannit amerlanerusuniittarput. Taakkuali tamarmik takussaajunnaarput. Tamannalu uggornarpoq.

Pinngortitap aningaasaqarnermit salliunneqalernissaa piffissanngortoq, taanna isumaqarpoq.

- Kangerlunni arfanniartoqartanera Kalaallit Nunaata aningaasaqarneranut ilapittuutaanngilaq. Qipoqqamit ilivitsumit neqaarniarnermi isertitat ullorlu naallugu arfersiornermi isertitat amerlaqatigiikannertarput. Arfersiornermili qipoqqanik siumugaqarsinnaasariaqarpoq, Kaare Winther Hansen oqarpoq.

Siunnersuut februaarip ulluisa 26-anni nalunaaqutaq ullup qeqqata tungaanut tusarniaassutigineqarpoq.