Qipoqqarniaqqusaajunnaarneq takornarialerisut piniartullu akerleriissutigaat

Qipoqqaat Nuup Kangerluaniittut eqqissisimatitaalernerat piniartut akerleraat. Qipoqqaat amerlavallaalerlutik aalisarfinnik akornusiinissaat Nuummi Aalisartut Piniartullu Peqatigiiffiata pinngitsoortikkusukkaluarpaa.

- Nuup Kangerluanut pulagaangamik nuna sineqqissaarlugu nerisassarsiorlutik ingerlaartarnerisigut aalisarfiit akornuserujussuarneqartaramik. Qipoqqaat neriniarnerminni aalisaatigineqartut bundgarnit aqqusaalutoringaagamikkit aserorterujussuartaramikkit ilaatigullu qipoqqaat imminoorfigisarlugit tamakkua bundgarnit, peqatigiiffiup siulittaasua, Anthon Egede, KNR-imut oqarpoq.

Qipoqqaat eqqissisimatinneqalernissaat Kommuneqarfik Sermersuumi Inuit Ataqatigiit, Demokraatit attaviitsullu Michael Rosingip akuerigaat, Siumup akerleraa.

AAMMA ATUARUK Siunnersuut akueraat: Qipoqqaat Nuup Kangerluaniittut eqqissisimatinneqassapput

Eqqissisimatitsilerneq angallammik takornariartitsisartup nuannaarutigaa.

- Ileqqoreqqusakkuulernera nuannaarutigaara. Isumaqarama illuatungeriinnut tamanut ileqqoreqqusatsialaasoq, Erik Palo Jacobsen, Arctic Boat Charterimi pisortaq oqarpoq.

NAPP: Eqqissisimatitsinerunngilaq

Qipoqqaat Nuup Kangerluaniittut Nuullu qanittuani Kangerup, Kitsissut, Angisunnguup Aqissersiorfiullu akornanniittut eqqissisimatinneqalerput.

Nuup Kangerluatali avataani suli piniagaasinnaapput. Qipoqqaat Nuup Kangerluanut pulasut eqqissisimatinneqalernerat NAPP-mit eqqissisimatitsinertut isigineqanngilaq.

- Takornariartitsisut ullaamiit unnussuarmut qipoqqaq eqqissisinngivillugu malersugarisarpaat ullorlu naallugu nerinngitsoortivittarlugu malersugaaraangamikku, taanna eqqissisimatitsinertut taaneqarsinnaanngilaq, Anthon Egede  oqarpoq.

Aalisartut piniartullu taamak isumaqarnerat takornarialerisup paasisinnaavaa, taannali allatut isumaqarpoq. Erik Palo Jacobsenip arfernik isiginnaartitseriaasertik ilaatigut pitsaanerpaaneq ajortoq nalunngilaa.

- Immaqa ilaanni ingasappallaarsinnaavoq, soorlu umiarsuarnik takornariartaatinik tikittoqarsimagaangat angallatit quliulluta arfeq ataaseq isiginnaaraangatsigu, tamanna immaqa pitsaavallaanngilaq, Erik Palo Jacobsen oqarpoq nangillunilu:

- Arferit ukiorparpassuarni isiginnaartarpakka. Sunalu nuannarinnginneraat paasinikuuara. Arfernik suliallit najoqqutassiaat atortarpagut. Isumaqanngilanga arferit nuannarinngikkaatigut. Nererujoortarput ingerlaqqillutillu, Erik Palo Jacobsen, Arctic Boat Charter-imeersoq oqarpoq.

Takornarialerisut: Kikkut tamarmik arfernik takorusuipput

Aalisartut piniartullu peqatigiiffianni siulittaasup nunami sulisartut suliassaasa ikilisinnaanissaat ernummatigaa

- Isumaqarpunga uannuinnaanngitsoq aalisartunuinnaanngitsorlu sunniuteqarnerluttorujuussasoq. Aalisarfissaraluatsinni qipoqqaq akornusersuilerpat tulaassassaagaluit annikillippata suliffissuarnilu sulisut suliassaat eqqorneqarpata aningaasarpassuarnik annaasaqaataasussaavoq qipoqqaq ataasiinnaagaluaruniluunniit, Anthon Egede oqarpoq.

Arferit takorusunneqartarmata takornarialerisut tamanna ernummatiginagu aningaasarsiutaalluarsinnaasoraat.

- Takornarialerineq nunatsinnut pingaaruteqartorujussuanngussasoq pingaarutilimmillu isaatitsissutaalissasoq isumaqarpunga. Taamaattumik tunngavimmigut ajunngilluinnarpoq, kikkummi tamarmik arferit isiginnaassallugit nuannaraat, Erik Palo Jacobsen oqarpoq.

Piffissami tusarniaaffiusumi akissuteqaatit 27-upput, taakkunannga 26-t akuersipput. Nuummi Aalisartut Piniartullu Peqatigiiffiat NAPP siunnersuummut akerliusutuaavoq.