Anna Wangenheim: Inuit innarluutillit Danmarkimiinnerat Danmarkip akilertassavaa
Naqqiissut: Ilanngutassiami siusinneursukkut nunatta inuit innarluutillit danskit inissiisarfiiniittunut ukiut 800 millionit koruunit atortarai allassimagaluarpoq. Peqissutsimut Inuillu innarluutillit pillugit naalakkersuisoqarfiup tamanna eqqortuunngitsoq kingorna ilisimatitsissutigaa. KNR-ip kisitsisit eqqortut allassimalersillugit ilanngutassiaq naqqiissuteqarfigaa.
Nunatta inunnik innarluutilinnik inissiinernut tamanut imaluunniit meeqqanik inersimasunillu innarluutilinnik innarluutilinnut tapersersuinermut inatsit naapertorlugu najugaqartitaanerinut kiisalu meeqqanut meeqqat inatsit malillugu tapersersorteqarnissaannut ukiumut 800 millionit koruunit sinnerlugit atortarpai. Tamanna 2024-mi nunap karsianut isertitat 10 procentiata missaanik naleqarpoq.
800 millionit koruuninit taakkunannga Danmarkimi inissiinernut Danmarkimiinnernullu akiliuteqartoqartarpoq. Tamanna nunatsinni periarfissaritinneqartut tamarmik atorneqarnerannik ilaatigut pissuteqarpoq. Danmarkimut inissiinermut aningaasartuutit 2023-mi 125 millionit koruunit missaanniipput.
Aningaasartuutilli taakku danskit naalakkersuisuinit siunissami akilerneqarnissaat Anna Wangenheimip kissaatigaa. Kissaatigisani tamanna Danmarkimi isumaginninnermut ineqarnermullu ministerimut Sophie Hæstorp Andersenimut, ulluni makkunani nunatsinni tikeraartumut, saqqummiutissavaa.
- Taakkuupput eqqartugassatta ilaat, isumaqaratta aamma pisussaaffik akisussaaffillu annertooq danskit naalagaaffiata naalagaaffittut pigigai. Neriuppungalu taakku isumaqatigiissuteqarfigisinnaajumaarigut, taanna oqarpoq, aasaq mannalu Danmarkimi ministerimik ataatsimeeqateqarnermini tamanna eqqartorsimallugu oqarluni.
2025-mut aningaasanut inatsit naapertorlugu Namminersorlutik Oqartussat ukioq manna inuit innarluutillit pinerlussimasut Danmarkimi najugaqarnerinut 34 millionit koruuninik atuissapput.
Tamatuma saniatigut kommunit tallimat ataatsimut 768 millionit koruunit sinnerlugit inuit innarluutillit paaqqutarineqarnissamik pisariaqartitsisut najugaqarnerinut atortarpaat, peqqissutsimut inunnullu innarluutilinnut naalakkersuisoq Anna Wangenheim KNR-ip radiokkut aallakaatitassiaanut Ulluni makkunani-mut paasissutissiivoq.
- Innuttaasut pisinnaatitaaffiinik tamakkiisumik naammassinnissinnaanngilagut. Assersuutigalugu maani nunatsinni isumagineqarsinnaananilu suliarineqarsinnaanngimmat nunarput allaat qimallugu Danmarkimi paaqqutarinnittarfinnut inissiisoqartarpoq. Tamannalu alianartorujorujussuartut isigaara.
- Nunatsinni inuit pisinnaatitaaffiinik naammassinnissagutta, danskit naalagaaffiat tapertaalluni akisussaaffimmik qanoq tiguseqataasinnaanersoq eqqartuissaagut, Isumaginninnermut ineqarnermullu ministerimik Sophie Hæstorp Andersenimik ataatsimeeqateqarnissaq pillugu Anna Wangenheim oqarpoq.
