Ukrainemut taarsigassarsisitsinernut akerleriissutaasunut Danmark akiligassaqalersinnaasoq

Ukrainemi aningaasat pisariaqartinneqarput. Ukiuni tulliuttuni marlunni Ukrainemiut inuiaqatigiit ingerlaannassappata Ruslandimullu sorsunneq ingerlatiinnarneqarsinnaassappat, 60 milliardit eurot missaat amigaatigineqassapput.

Taamaattumik ministeriuneq Mette Frederiksen (S) naapertorlugu EU-p Ataatsimiititaliarsuata Ukrainemut taarsigassarsisitsinissamik siunnersuutaa akerleriissutaasoq EU-p tapersersortariaqarpaa.

Aningaasat Ruslandip aningaasaataanit uninngatinneqartunit tiguneqassapput. Tamanna pisinnaassappat EU-mi nunat tamarmik taarsigassarsititsinissamut qulakkeerinneqataasariaqarput. Taamaalillunilu sorsunnerup kingorna akiligassat qallunaat akileraartartuisa akilertussanngussavaat.

- Ukrainep sakkutuui aningaasanik pisariaqartitsipput. Sorsunneq akisulluinnarpoq. Akisoorujussuuvoq. Taamaattumik aningaasanik nassaartariaqarpugut, taamaaliornerlu pitsaanerpaasoraara.

- Tamattali qularnaveeqqusiisariaqarnerput ilumoorpoq, Mette Frederiksen oqarpoq.

Aningaasaqarnikkut ajornartorsiorneq aserorterinerillu annertuut

EU-lli Ataatsimiititaliarsuata siunnersuutaani sorsunnerup kingorna Ruslandip Ukrainemut taarsiissuteqarnissaanik eqqarsartoqarpoq. Taamaaliortoqassappallu Ukrainep taarsigassarsiaq akilissavaa.

USA-lli præsidentianik Donald Trumpimik eqqissinissamik isumaqatigiissuteqartoqassappat, Ruslandip taarsiissuteqarumajumaarnera qulakkeerneqarsinnaanngilaq.

Sorsunnerup kingorna Ukrainep aningaasaqarnikkut ajornartorsiornissaa aserorterinerillu annertoorujussuunissaat ilimanarluinnarpoq, taamaattumillu taarsigassarsiamik akiliinissaq ajornakusoorsinnaavoq.

Tamatuma kingunerisaanik Europami akileraartartut akiligassaqalernissaat ilimanarneruvoq.

Ruslandip aningaasaatai uninngatinneqartut Ukrainemut taarsigassarsisitsinissamut EU-p atorniarpagit, EU-mi nunat allat akiligassamik akileeriartarsinnaaneq pillugu akuersinerinik Belgia atsiornermik perusuttoq, Belgiap ministeriunera sisamanngornermi naqissusiivoq.

Nunap ernummatai tamarmik eqqumaffigineqareerpata Belgiamiut isumassarsiaq aatsaat akuerisinnaagaat, taanna erseqqissaavoq:

- Inatsisitigut qularnaatsumik, ataqatigiissumik ammasumillu ingerlatsisoqarnissaa kissaatigaara, Bart de Wever oqarpoq.

/ritzau/