Borgmesteri atuarfiup uiverutigineqarnera pillugu: - Modulinik sanaartugassat misissorpagut
Borgmesterip, Avaaraq Olsenip Qanoruumit septembarip 29-ani apersorneqarnermini kommunip nunanit allanit modulinik sanaartugassanik periarfissat misissorneqarnerarlugillu kommunalbestyrelsip suliaq erngertumik oqaluuserissagaa oqaatigaa.
Kommunilli maanna aalajangersimasumik pilersaaruteqannginnerarpaa.
Nuummi modulinik sanaartugassanut tunngasut tamarmik suli pilersaarusiorneqanngikkunik misissuinermiittut, Kommuneqarfik Sermersooq allagaatinik takunninnissamut qinnuteqaammut akissummi allappoq. Taamaammallu uppernarsaatinik, aalajangiiffigisassatut saqqummiussamik soqaranilu piffissamut pilersaaruteqanngikkallarpoq.
Kommunilli saqqummiussassaqarniariartoq nalunaaruteqarnissani neriorsuutigaa.
Siumut erseqqissaaqqusisoq
Kommuneqarfik Sermersuumi Siumut gruppiani borgmesterip suliamik isumaginninnera naammasigimaarneqanngilluinnarpoq.
Tamanna gruppip siulittaasuata, Dorthe-Marie Mogensen-Fontainip KNR-imut oqaatigaa.
- Aqutsinerlunnermut takussutissaavoq. Borgmesterip Avaaraq Olsenip aamma Meeqqanut, Ilaqutariinnut, Atuartitsinermut ataatsimiititaliami siulittaasup Poul Petersenip atuartunut ilinniartitsisunullu atatillugu qanoq pilersaaruteqartoqarneranik innuttaasunut nassuiaateqarnissaanut piffissanngorpoq. Atuarfik Inussuk qaqugu ammarnissaa naatsorsuutigisinnaavarput?
Tamatuma saniatigut borgmesteri matoqqavallaarnerarlugu oqallinnermullu ilaatitsinnginnerarlugu isornartorsiorpaa.
- Paasissutissiiffigineqarneq ajorpugut. Tusagassiuutit aqqutigalugit tusartarpagut. Kommunip modulinik sanaartugassat misissorai borgmesterip Qanoruumi oqaatigimmagu uissuummivunga. Soorunami modulinik sanaartugassat misissorneqartut?
- Kommunip ikuallattoqarnissaanut qamiterutit qilaaniittartut suliarinnittussarsiuutilersimagai suliarlu 2026-mi aggustimi naammassissangatinneqarnera aamma uissuummissutigaara. Susoqarneranik ilisimasaqanngilagut. Kommune suliamut atatillugu nakerisarsiunngitsumik misissuinermik aallartitsisimasoq borgmesterimit Avaaraq Olsenimit taamaallaat nalunaarutigineqarnikuuvoq. Allamik ilisimasaqanngilagut, Dorthe-Marie Mogensen-Fontain oqarpoq.
Nuummi atuarfiit arlallit inoqanngitsut
Ukaliusap sapaatip akunnerata siuliani matuneqarnerata kingunerisaanik atuartut 500-t missaanniittut sumiiffinni assigiinngitsumi maanna atuartinneqarput.
Tamatuma saniatigut Atuarfik Inussut siorna ammartussaagaluartoq suli inoqanngilaq.
- Atuarfik Inussut maanna sivisuumik inoqanngilaq, susoqarnissaa ilisimanngilarput. Pissutsini ilungersunarluinnartuniippugut. Siumut gruppianit erngertumik aggersarneqarnissarput qinnutigaarput. Maannamullu suli tusagaqanngilagut, Dorthe-Marie Mogensen-Fontain KNR-imut oqarpoq.
