Naalakkersuisut siulittaasuat EU-p præsidentia naapikkaa

Naalakkersuisut siulittaasuat EU-mi Folketingimilu politikkikkut aaqqissuussanut arlalinnut peqataajartorluni Danmarkiliarpoq.

Allattoq Ivalu Nivi Johansen

oktobarip 01-at 2025 14:47

Nutserisoq Medea Olsen

Naalakkersuisut siulittaasuata Jens-Frederik Nielsenip EU-p præsidentia António Costa ataatsimeeqatigaa.

Naalakkersuisut Facebookimi qupperneranni siulittaasoq oqaluttuarpoq Kalaallit Nunaat EU-p aningaasaqarnikkut isumannaatsuuneranut namminersulernissaanullu tapersersuisinnaasoq.

Oqaatsit taakku qanoq paasisassaanersut, allagarsiussami allaqqanngilaq. Aatsitassarsioqatigiiffiulli GreenRoc-ip Kujataani grafitimik piiaaffimmik ammaaniarnera EU-p suliniutitut pingaarutilittut nalilersimagaa, KNR-ip siusinnerusukkut allaaserinikuuaa.

- Kalaallit Nunaata EU-llu suleqatigiinnerat ineriartortuartoq inuiaqatigiillu ineriartornerannut pingaaruteqarluinnartumik kinguneqarsinnaasoq ataatsimiinnermi takutinneqarpoq, naalakkersuisut Facebook-imi allapput.

Naalakkersuisut siulittaasuat Jens-Frederik Nielsen oktobarip qulingata tungaanut Danmarkimi EU-milu tikeraassaaq, tassani European Political Communitymi peqataassalluni.

Angalanermi Folketingip ammaanersiorneqarnerani peqataassaaq Europamilu inatsisartuni oqalugiassalluni.

EU-p nuannarineqalerniarnera ataatsimut isigalugu

EU ukiuni kingullerni marlunni nunatsinniinnerulerpoq.

EU-p allaffik Nuummi 2024-mi marsimi ammarpaa, tamanna ataatsimiititaliami siulittaasup, Ursula von der Leyenip atoqqaartippaa. Ukiup ingerlanerani kingusinnerusumi nunat tamalaat akornanni suleqatigiinnermut EU-p kommissæria aatsitassat pillugit oqaloqatiginnikkiartorluni tikippoq.

Allaffiup ammarnerata kingunerisaanik isummanik misissuineq tupaallannartoq ingerlanneqarpoq, tassanilu kalaallit 60 procentiisa EU-mut ilaasortanngoqqinnissaq kissaatigigaat takutinneqarpoq.

Amerikamiut præsidentiata, Donald Trumpip nunatsinnik tiguaanissamik oqaaseqarnerata kingunerisaanik EU-p avannaa ukkatareqqilerpaa.

Danskit europaparlamentimi Renewimi politikikkut gruppianni liberalinit 2025-mi februaarimi nuannarineqalerniartoqarpoq.

Franskit præsidentiat, Emmanuel Macron Nuummut 2025-mi juunimi tikeraarpoq. Immikkut ilisimasallit EU-p niueqatigineqaannarnani annerusinnaasoq periarfissaq atorlugu takutitsinertut nalilerpaat.

Danmark EU-mi 2025-mi juulip ukiut sinnerata tungaanut siulittaasuuffeqarpoq. Tassungalu atatillugu EU-mi nunat 27-t aallartitaat Ilulissanut Nuummullu tikeraarput.

EU-mi siulittaasuuffik Naalagaaffiit Peqatigiinnit aningaasanik, issittumi inunnut silap pissusianik eqqugaasunut atorneqartussanik pissarsinissamut ilaatigut atorneqassaaq.

Allisiguk

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.