Timmisartukkut angallannermi uivertoqaqqinnerata kingorna: Angallannermik Aqutsisoqarfik maanna oqaaseqartoq
- Nuummi Mittarfimmi timmisartukkut angallannermi timmisartuutileqatigiiffiit Greenland Airportsip nalunaarutigeqqaagaanit amerlanerusut angallapput. Greenland Airportsip Nuummi malittarisassat assigiinngitsut Mittarfimmut timmisartuussinermilu paasissutissiinermi atuuttut malissimanngilai.
Angallannermut Aqutsisoqarfimmi allaffimmi pisortaq, Signe marie Finderup Slot allakkatigut akissummi allappoq.
Tamannalu tunngavigalugu nunatsinni timmisartukkut angallannermi allannguuteqartoqangaatsiassasoq aqutsisoqarfiup nalunaarutigeqqammerpaa.
Mittarfimmi akunnermut suliaqarnerit sisamaannaasinnaapput – suliaqarnerni tikittut mittulluunniit pineqarput. Tamanna pissutigalugu Air Greenlandip Nuup nunattalu sinneranut ullormut timmisartuussisarnerisa 40 procentii pilersaarut malillugu naammassineqarsinnaajunnaarput.
Tamanna unnuinissat amerlanerulernerannik kinguneqassaaq, Air Greenlandillu tamanna "Air Greenlandip ingerlatsineranut akisunerulersitsissasoq" nalunaarutigaa.
Timmisartumut billettit akisunerulerneranik kinguneqassanersoq oqaatiginngilaat.
Greenland Airports qisuariaateqartoq
Greenland Airportsimi attaveqatigiinnermut pisortap, Mikkel Bjarnø Lundip timmisartuutileqatigiiffiit naatsorsuutigisamit amerlanerusimanerat KNR-imut nassuerutigaa.
- Timmisartuutileqatigiiffiit nutaat arlallit Nuummiilersimallutillu suliaqartoqarnerulerpoq, tamannalu pitsaasuuvoq. Timmisartuutileqatigiiffiilli uku nutaat Air Greenlandimut sanilliullugu nakkutigineqanngitsumik silaannakkut angallannermik sungiusimannittuunersut naatsorsuutigineqarsinnaanngilaq, allakkatigut akissummi allassimavoq.
Tassunga ilanngullugu Greenland Airportsip ajornartorsiutaalersunut nutaanut aaqqiissutissaasinnaasumik sapaatit akunnerisa sisamat tallimallu akornanni nassaarniarnissani anguniassagaa paasissutissiissutigaa.
Taamaakkaluartorli aaqqiissutissat assigiinngitsut qanoq ilaqarumaarnissaat piffissami matumani oqaatigisinnaanngilaa. Ajornartoornermili periarfissaalluartoq oqaatigaa.
- Kisianni silaannakkut angallannermi timmisartunik nakkutiginninneq aaqqiissutissatut misissorniarlutigu oqaatigisinnaavara, attaveqatigiinnermut pisortaq allakkatigut akissummi paasissutissiivoq.
Tamannali qanoq ilaqarnersoq itisilinngilaa.
Angallannermut Aqutsisoqarfiup suliniutit nutaat qaqugu atuutilissanersut oqaatigisinnaanngilaa, mittarfimmili isumannaallisaaneq Greenland Airportsip akisussaaffigigaa allallugu.
- Angallannermut Aqutsisoqarfik Nuummi Mittarfimmik sukannersumik nakkutiginniinnassaaq Greenland Airportsilu timmisartuutileqatigiiffiillu allat matumani Air Greenland ilanngullugu malittarisassat nutaat pillugit qanimut oqaloqatigalugit, Signe Marie Finderup Slot allappoq.
