NIIK-ip innarluutilinnut naalakkersuisoqarfeqalernera nuannaarutigigaa

Naalakkersuisunngortitsinermi tallimanngormat pisumi, partiit sisamat suleqatigiinnissaminnut isumaqatigiissutertik saqqummiuppaat.

Tassani atuarneqarsinnaavoq, nunatsinni innarluutillit atugaat pillugit naalakkersuisoqarfik nutaaq pilersinneqartoq, peqqissutsimut naalakkersuisoqarfiup ilaatut. Tamanna Nunatsinni Inuit Innarluutillit Kattuffianni siulittaasup Viggo Johansenip nuannaarutigaa. 

- Nuannaaqaanga. Innarluutilinnut tunngasumik toqqaannartumik naalakkersuisoqaleratta. Naalakkersuisoqarfik innarluutilinnut tunngasunik akisussaaffilik pilersinneqarmat nuannaarutigivara immikkuullarissutullu taarusullugu. 

Viggo Johansenip immikkuullarissutut taasaa tassaavoq, naalakkersuisoqarfimmik innarluutilinnut akisussaaffeqalertussamik siullerpaamik naalakkersuisoqarfeqalermat. Alloriarneq taanna nuannaarutigaa, naalakkersuisumillu suleqateqarluarnissani qilanaaralugu.

Nunatsinni inuit innarluutillit ukkatarineqassapput

Partiit sisamaasut suleqatigiinnissaminnik isumaqatigiissutiminni allapput, innarluutillit atugaasa pitsanngorsaavigineqarnissaat ukkatarissallugu. Pitsanngorsaaniarneq Viggo Johansenip ilassilluarpaa.  

- Innarluutilinnut tunngatillugu annertoorujussuarnik nunatsinni suliassaqarpoq. Taamaattumik soqutigisaqaqatigiit imaluunniit soqutigisatta naapitinniartarnissaat annertuumik suliassaasoraara, aammalu oqaluutigaatsiartartussaassagunarpugut, Viggo Johansen isumalluarpaseqaluni oqarpoq, nangillunilu:

- Pitsanngorsaaniarneq innarluutilinnut atugarisaanullu sulinissamut atorluaqqunaqaaq. Taamaattumik takorloorneqarsinnaavoq isummat assigiinngitsut aamma saqqummiunneqartarsinnaasut aammalu inisseeriarnissamut attuumassuteqartut isummat saqqummiunneqartarsinnaasut. Isumaqatigiinngikkaluaraanniluunniit suleqatigiinnissaq pisariaqarluinnartussaassaaq innarluutilinnut sullissiniarnermi pissutsit pitsanngorsarniarneqassappata, Viggo Johansen naggasiivoq.