Ane Lone Bagger allagaq ilumuunngitsoq pillugu: Politiinut unnerluutigineqarpoq
![](/sites/default/files/styles/image_934x467/public/oembed_thumbnails/2022-12/1rlzs8bDrZqkdQUMYfgW3wqrNtGlzqSCQyD_NdUagAg.jpg?itok=Tiyp2tCV)
Naalakkersuisoq, Ane Lone Bagger (S) attaveqaqatigiittarfitsigut Redditikkut Indie Bayikkullu siammarterneqartumut allakkamut eqqunngitsumut nammineq atsiornerminik ilaqartumut nittartakkatigut aatsaat siullermeerluni oqaaseqarpoq. Oqaaseqarneratulli taassallugu immaqa annertuallaarpoq – allakkammi oqaaseqarfiginissaa pissutissaqartinngilaa.
- Uanga isumaqarpunga piffissaajaatigissanngikkipput ilumuunngimmat, nunanut allanut tunngasunut naalakkersuisoq, amerikamiut nunanut allanut tunngasunut ministerianik Mike Pompeomik Washingtonimi ataatsimeeqateqaqqammerluni TV2 aqqutigalugu KNR-imut oqarpoq.
Allakkap imarisaani isuma akerleriiffiuvoq. Allakkami Ane Lone Baggerip nunatta Danmarkimit avissaarnissaanut innuttaasunik taasititsinissamut aningaasanik amerlanerusunik USA-mut piumasaqarpoq – USA-lu kalaallit namminersulernissaannut taasititsipallattoqarnissaanut isertortumik tapersiisoq allassimavoq.
AAMMA ATUARUK Hammond allagaq ilumuunngitsoq pillugu: Uissuummerpunga – uissuummerpallaarnangalu
Allagaq Naalakkersuisut allagassiaat atorlugu allagaavoq, kimilli allagaanersoq suli ilisimaneqanngilaq.
- Kisianni suliaq politimesterembedimut soorunami tunniunneqarnikuuvoq. Taanna pisoq allamik oqaaseqarfigissanngilara, Ane Lone Bagger oqarpoq.
Politiit allagaq tigusimallugu uppernarsarpaat, politiilli annerusumik aamma tusarliiniarpallaanngillat.
- Kalaallit Nunaanni Politiit aamma Politiit isertortumik paasiniaasartuisa allagaq misissorpaat, suliamullu atatillugu allamik oqaasissaqarnatik, politiit mailikkut allapput.
AAMMA ATUARUK IA allagaq ilumuunngitsoq pillugu: Killissamik qaangiingaatsiartoqarpoq
Danskit nunanut allanut tunngasunut ministeriata, Jeppe Kofodip allagaq ilumuunngitsoq aamma marlunngornermi oqaaseqarfiginianngilaa.
- Suliat erseqqissumik ilumuunngitsut soqutiginniffigissanngilavut, tamanna naleqqutinngilluinnarpoq. Inuinnaat naalakkersueqataaffiini oqallinnermik aserorterisuupput. Tamakkuninnga allattoq ataasiinnarmik siunertaqarpoq: malugitinniarluni avissaartuutitsiniarlunilu, Jeppe Kofod oqarpoq.
Immikkut ilisimasallit Rusland allagaqartuusinnaasoq Politikenimut oqaatigaat. Russit Københavnimi aallartitaata tamanna ippassaq eqqunngitsuunerarpaa.