Allakkat ilumuunngitsut Ruslandip akisussaaffiginnginnerarpai
- Akisussaassuseqanngitsoq, pissutissaqanngitsoq Ruslandillu Issittumut politikkianik kukkusumik takorluuisoq.
Ruslandip Københavnimi aallartitaqarfia taama qisuariarpoq, Politiken -imi immikkut ilisimasallit Ruslanderpiaq allakkanut ilumunngitsunut aallaaviunerarmassuk, allakkallu taakku inuit attaveqaqatigiittarfiini Reddit-imi aamma Indie Bay-imi takuneqarsinnaapput.
Allakkat Naalakkersuisut allaffissiaanni allagaapput nunanullu allanut tunngasunut naalakkersuisup Ane Lone Baggerip atsiorneranik ilaqarlutik.
Imai aamma akerleriiffiusinnaapput. Allaqqavoq Ane Lone Baggerip USA aningaasanik amerlanerusunik qinnuigigaa Kalaallit Nunaata Danmarkimit kaanngarnissaa pillugu taasisitsinissamut atugassanik. Allakkalli ilumoortuunngillat.
AAMMA ATUARUK Hammond allagaq ilumuunngitsoq pillugu: Uissuummerpunga – uissuummerpallaarnangalu
Politiken taama allappoq, paasissutissallu ilumoornerinik Nunanut Allanut Naalakkersuisoqarfimmi pisortaq Kenneth Høegh KNRimut uppernarsaavoq.
Berlingske naapertorlugu pisuutitsinerit Ruslandip Københavnimi aallartitaqarfiata tusarumanngivippai.
- Issittumi naalagaaffiit akunnerminni attaveqatigiinnerat Ruslandip akuliuffigisimanngisaannarpaa aamma qaquguluunniit akuliuffiginavianngilaa, aallartitaqarfik ilumuunnginneraanermini allappoq, taannalu inuit attaveqaqatigiittarfiini arlalinni ilanngunneqarpoq.
- Oqqassaarinermik taasuminnga allattut Issittumi Ruslandip nukittunerusumik inissisimanissaanik nunarsuullu ilaani tassani pissanganartorsiunnginnissamut akerliusut akornanniissapput, Ruslandip aallartitaqarfia oqaaseqaammini taama allappoq.
AAMMA ATUARUK Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq
Ane Lone Baggerip allakkat oqaaseqarfigiumanngilai. Washingtonimut aallarpoq, tassani USAp nunanut allanut tunngasunut ministeria Mike Pompeo pingasunngorpat danskit nunanut allanut tunngasunut ministeriat Jeppe Kofod (Soc.) ilagalugu ataatsimeeqatigissallugu.
Pissaanilissuit Kalaallit Nunaannik ukkataqaleruttorfianni takkupput. Oktobarimi danski nunanut allanut tunngasunut ministeriat Jeppe Kofod Nuummiippoq Ane Lone Bagger ataatsimeeqatigalugu – piffissamilu tassanerpiaq USAmi atorfilittaq Thomas Ulrich Brechbuhl-imik atilik aamma Nuummut pilluni. USAmi illersornissaq pillugu ministereqarfimmi atorfillit aamma USAp naalagaaffiata isumannaalissaanermut ataatsimiititaaliaaneersut tikeqatigai.
USAmi sinerissamik nakkutilliisut qullersaata admiral Karl Schultzip qaammat kingulleq Kalaallit Nunaat tikeraarpaa.
Aamma nunanut allanut aallartitap Carla Sandsip ukioq manna arlaleriarluni nunatsinnut tikippoq, Amerikamiullu nunatsinni aallartitaqarfimminni sulisut 2020-mi amerliniarpaat ataatsimit arfineq marlunnut.
