Hammond allagaq ilumuunngitsoq pillugu: Uissuummerpunga – uissuummerpallaarnangalu
![](/sites/default/files/styles/image_934x467/public/article_images/aleqa_hammond.jpg.jpg?itok=3b0YjDeH)
Allagaq nittartakkatigut attaveqaqatigiittarfitsigut siammarterneqarpoq. Taanna Naalakkersuisut allagassiaat atorlugu allagaavoq nunanullu allanut tunngasunut naalakkersuisup, Ane Lone Baggerip atsiorneranik atsioqqalluni.
Allakkap imarisaani isuma akerleriiffiuvoq. Allakkami Ane Lone Baggerip nunatta Danmarkimit avissaarnissaanut innuttaasunik taasititsinissamut aningaasanik amerlanersunik USA-mut piumasaqarpoq. Allagarli ilumunngilaq.
Tamanna Politikenip ippassaq allaaseraa, paasissutissallu KNR-ip nunanut allanut tunngasunut naalakkersuisoqarfimmi pisortamit, Kenneth Høeghimit uppernarsartippai.
AAMMA ATUARUK Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq
Kina allakkamik allattuunersoq nittartakkatigullu attaveqaqatigiittarfinnut, Redditimut Indie Bayimullu ikkussisuunersoq ilisimaneqanngilaq. Aleqa Hammondili Nunanut allanut Sillimaniarnermullu politikkip ataatsimiititaliaani siulittaasoq qularutiginninngilaq: Tassuma russit allagaqartuusorai.
- Nunarput sammineqangaatsiarpoq. Amerikamit siinniisut nunatsinnukariataarput tamanna russinut amerlasuutigut uuminarpoq. Danmarkip nunattalu ataatsimoorlutik amerikamiunut isumaqatigiissuteqarsinnaanerat russinut uuminarpoq, Aleqa Hammond (NQ) oqarpoq.
Ataatsimiititaliaq tallimanngormat ilisimatinneqartoq
Allagaq nunat pissaanilissuit Kalaallit Nunaannik ukkataqarnerata nalaani saqqummerpoq. Danskit nunanut allanut tunngasunut ministeriat, Jeppe Kofod Ane Lone Bagger ataatsimeeqatigiartorlugu oktobarimi Nuummiippoq - piffissamilu tassanerpiat amerikamiut atorfilittaat, Thomas Ulrich Brechbuhlimik ateqartoq aamma illoqarfiit pingaarnersaanniippoq. Taassuma amerikamiut aallartitaqarfianit, Carla Sands sinniisullu amerikamiut illersornissamut ministereqarfianeersut USA-llu sillimaniarnermut siunnersuisooqatigiivineersut ilagai.
Aammattaaq amerikamiut sinerissami alapernaarsuisuini naalakkat qaffasinnerpaartaat Karl Schultz qaammat kingulleq nunatsinnut tikeraarpoq.
Amerikamiut Danmarkimi aallartitaata, Carla Sandsip nunarput ukioq manna qasseeriarluni tikeraarpaa, tamatuma saniatigut amerikamiut sinniisui nunatsinniittut ataatsimiit arfineq-marlunnut 2020-mi amerliniarai oqaatigineqarpoq.
Aleqa Hammondip oqarnera naapertorlugu ataatsimiititaliaq allagaq pillugu tallimanngormat ilisimatinneqarpoq.
Paasissutissat mianersuutissavagut
- Uagut ataatsimiititaliamit allagaq nammineq takunngilarput, nunanut allanut naalakkersuilli allakkap siammarterneqarneranik ilisimatippaatigut. Taassuma allagaq eqqunngitsuusoq siulliulluni ataatsimiititaliamut oqaatigaa, Aleqa Hammond oqarpoq.
Tamanna qanoq qisuariarfigaajuk?
- Uissuummivunga – uissuummivallaarnangalu. Nutaarsiassat eqqunngitsut mianersuuttussaagigut nalunngilarput, ataatsimiititaliap siulittaasua oqarpoq.
AAMMA ATUARUK Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq
- Allagarli Naalakkersuisut allagassiaat atorlugu allanneqarsimammat Ane Lone Baggerilu atsiortuusimammat uissuummissutigaara. Tamatuma ilungersunartumik tiguneqarnissaanut aamma takussutissaavoq. Suleqatigisatta Naalagaaffeqatigiinni suleqatigiinnitsinnilu suleqatigiinnerput qanoq pitsaatiginersoq apeqqusersinnaavaat.
- Taamaammat paasissutissaatitta paarinissaanut erseqqissumik politikkeqassaagut, taamaaliornikkut allaneersut allakkiaatigut atsiornigullu tiguinnarsinnaassagit.
Ane Lone Baggerip allagaq oqaaseqarfigiumanngilaa. Taanna danskit nunanut allanut tunngasunut ministeriat, Jeppe Kofod (Soc) peqatigalugu amerikamiut nunanut allanut tunngasunut ministeriat, Mike Pompeo naapikkiartorlugu Washintoniliarpoq.