Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq
Allakkami eqqunngitsumi nunanut allanut tunngasunut naalakkersuisup, Ane Lone Baggerip amerikamiut senatiat Tom Cotton Kalaallit Nunaata Danmarkimit avissaavinnissaanut innuttaasunit taasititsinissamut aningaasanik amerlanerusunik piumasaqarfigaa.
- Attaveqatigiinnermik avissaarnissamut ikiorneqarnissarput qaffasinnerpaamik piumasaqaatigivara, allakkami allassimavoq.
Allagarli eqqunngitsuuvoq. Ane Lone Baggerip allagaq nammineerluni oqaaseqarfigerusunngilaa nunanulli allanut tunngasunut naalakkersuisoqarfiup allagaq Politikenimut eqqunngitsuunerarpaa.
Nunanut allanut naalakkersuisoqarfimmi pisortaq, Kenneth Høegh, KNR-imut ima oqarpoq:
- Peqquserluununa. Allamik oqaatigisassartaqanngilaq, taanna oqarpoq erseqqissarlugu, naalakkersuisoqarfini alamik oqaaseqaqqissanngitsoq.
Naalakkersuisut USA suleqatigalugu Kalaallit Nunaata piaarnerpaamik namminiilivinnissaa pillugu innuttaasunik taasititsisoqassasoq allakkami aamma allassimavoq. Tamatumalu kingorna Kalaallit Nunaat ”Naalagaaffittut nammineertutut sakkutooqarnikkut ililersortuunngitsutut” inissisimalissalluni.
Politikenip immikkut ilisimasallit qassiiusut oqaloqatigisaasa oqarnerat naapertorlugu Danmarkip Kalaallit Nunaatalu akornanni avissaartuuttoqalernissaa allakkap siunertaraa.
- Tusagassiuutit eqqunngitsut salloqittaatillu isumasiuminaatsuunerusaraluarput. Taamaaliortoqarnera, tassa atsiornerup eqqunngitsup allakkallu eqqunngitsup atorneqarnera peqqarniitsuuvoq. Iliuuserineqartartunit naliginnaanerusunit peqqarniinnerungaatsiarpoq, majoori, sakkutooqarnermilu misissueqqissaartartoq, Steen Kjærgaard Politikenimut oqarpoq.
Politikenip allaaserisaa naapertorlugu allagaq nittartakkatigut attaveqaqatigiittarfinni Redditimi Indybayimilu saqqummersinneqarpoq.
Danskit nunanut allanut tunngasunut ministeriata, Jeppe Kofodip (Soc) nunanut allanut tunngasunut naalakkersuisumik, Ane Lone Baggerimik (S) ataatsimeeqatiginnikkiartorluni Nuummiinnerani amerikamiut atorfilittaat Thomas Ulrich Brechbuhlimik ateqartoq aamma Nuummiippoq. Taassuma amerikamiut aallartitaqarfianit, Carla Sands sinniisullu amerikamiut illersornissamut ministereqarfianeersut USA-llu sillimaniarnermut siunnersuisooqatigiivineersut ilagai.
Thomas Ulrich Brechbuhl tamanit siammasissumik ilisimaneqanngilaq. Berlingskelli allaaserisaa naapertorlugu taanna tassaavoq Trumpip amerikamiullu nunanut allanut tunngasunut ministeriata, Mike Pompeop nunanut allanut tunngasunut politikkianik naammassinninnissamik isumagisaqartartoq.
Aammattaaq amerikamiut sinerissami alapernaarsuisuini naalakkat qaffasinnerpaartaat Karl Schultz qaammat kingulleq nunatsinnut tikeraarpoq.
Amerikamiut Danmarkimi aallartitaqarfianit tusagassiuutinut nalunaarut naapertorlugu admiralip, Karl Schultzip kalaallit qaffasissumi atorfillit qassiiusut ataatsimeeqatigissavai, tikeraarneranullu USA-p, kunngeqarfiup nunattalu suleqatigiinnerisa pitsaanerulersinnissaa siunertaavoq.
Amerikamiut Danmarkimi aallartitaata, Carla Sandsip nunarput ukioq manna qasseeriarluni tikeraarpaa, tamatuma saniatigut amerikamiut sinniisui nunatsinniittut ataatsimiit arfineq-marlunnut 2020-mi amerliniarai oqaatigineqarpoq.
Tamatuma qaavatigut præsidentip Donald Trumpip nunatsinnik piserusunnerminik eqqarsaatini oqaatiginikuullugit, tamannali Naalakkersuisut siulittaasuanit, Kim Kielsenimit ministeriunermiillu Mette Frederiksenimit itigartitsissutigineqarpoq.
Amerikamiut nunanut allanut tunngasunut ministeriata, Mike Pompeop nunatsinnut tikeraarnissaa upernaaq nalunaarutigineqarpoq. Tikeraartussannguliivissorli taamaatiinnarneqarpoq.
