IA allagaq ilumuunngitsoq pillugu: Killissamik qaangiingaatsiartoqarpoq
Killissaq qaangingaatsiarneqarpoq, nassitsisumullu kinguneqartitsineq.
Inuit Ataqatigiit Siumullu amerikamiut senaatianut allakkap nittartakkatigut attaveqaqatigiittarfitsigut, Redditikkut Indie Bayikkullu saqqummereernerani taama qisuariaateqarput. Allakkami Ane Lone Baggerip nunatta Danmarkimit avissaarnissaanut innuttaasunik taasititsinissamut aningaasanik amerlanersunik USA-mut piumasaqarpoq. Allagarli ilumuunngilaq. Allakkami aamma allassimavoq nunarput amerikamiut ikiuineratigut naalagaaffittut nammineertutut sakkutooqarnikkut illersortuungitsutut siunissami inissisimalissasoq.
Allagaq Naalakkersuisut allagassiaat atorlugu Ane Lone Baggerillu atsiortariaasaa atorlugu allagaavoq, allagarli ilumuunngilaq.
Tamanna Politikenip ippassaq allaaseraa, paasissutissallu KNR-ip nunanut allanut tunngasunut naalakkersuisoqarfimmi pisortamit, Kenneth Høeghimit uppernarsartippai.
AAMMA ATUARUK Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq
Nunanut allanut tunngasunut sillimaniarnermullu ataatsimiititaliaq allagaq pillugu tallimanngormat ilisimatinneqarsimasoq aamma uissuummeqqavoq.
Tupaallannartorujussuuvoq taamaattumik sanasoqarsinnaasimammat
- Soorunami tupaallannartorujussuuvoq taamaattumik sanasoqarsinnaasimammat, ataatsimiititaliami siulittaasup tullia, Mimi Karlsen (IA) oqarpoq.
- Allakkamik allaatiginnittut Naalagaaffeqatigiinni aamma USA-p Danmarkillu akornanni avissaartuuttoqarnissaanik pilersitserusuttut qularutiginngilara.
Allagaq ilumuunngitsoq. Assi: Indie Bay
Qanoq iliuuseqarfiginiarpisiuk?
- Russit allakkamik suliaqartuunissaat qularnanngitsoq oqaatigineqarpoq. Ersarissumik maanna nalunaaruteqarnissarput pingaaruteqarpoq. Imaassaaq siunissami taama pisoqaqqikkaangat qanoq isumaqarnerluta nunallu sorliit suleqatigerusunnerlutigit ersarissumik nalunaarutigiuaannassavarput. Taamaaliornikkut naalagaaffeqatigiinnit aninissamut piareerluta nalunaaruteqarutta eqqunngitsumik saqqummiisoqartoq inuit takusinnaasassavaat, Mimi Karlsen oqarpoq.
Qarasaasiatigut isumannaannerusoqassasoq
Siumumit, ataatsimiititaliami ilaasortap, Karl Kristian Krusep allagaq ilumuunngitsoq mamianarnerarpaa.
Taamatut iliuuseqartoqarnera pinerlunneruvoq aamma akuersaarneqarsinnaanngilaq
- Naatsumik oqaatigissagaanni taamatut iliuuseqartoqarnera pinerlunneruvoq aamma akuersaarneqarsinnaanngitsoq. Inuiaqatigiinnut aamma nunarsuarmi taamatut siammarterneqarnera pineqartumut imaannaanngilaq, Karl Kristian Kruse oqarpoq.
Taassuma oqarnera naapertorlugu ataatsimiititaliami ilaasortat tamarmik USA-p præsidentiata nunatsinnik piserusulluni aasaq nalunaaruteqarnera aaqqissuussaanermillu inissisimanerput nunarsuarmit ukkatarinnitsitsilersoraat.
AAMMA ATUARUK Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq
Danskit nunanut allanut tunngasunut ministeriat, Jeppe Kofod Ane Lone Bagger ataatsimeeqatigiartorlugu oktobarimi Nuummiippoq - piffissamilu tassanerpiat amerikamiut atorfilittaat, Thomas Ulrich Brechbuhlimik ateqartoq aamma illoqarfiit pingaarnersaanniippoq. Taassuma amerikamiut aallartitaqarfianit, Carla Sands sinniisullu amerikamiut illersornissamut ministereqarfianeersut USA-llu sillimaniarnermut siunnersuisooqatigiivineersut ilagai.
Aammattaaq amerikamiut sinerissami alapernaarsuisuini naalakkat qaffasinnerpaartaat Karl Schultz qaammat kingulleq nunatsinnut tikeraarpoq.
AAMMA ATUARUK Hammond allagaq ilumuunngitsoq pillugu: Uissuummerpunga – uissuummerpallaarnangalu
Amerikamiut aallartitaata, Carla Sandsip nunarput ukioq manna qasseeriarluni tikeraarpaa, tamatuma saniatigut amerikamiut sinniisui nunatsinniittut ataatsimiit arfineq-marlunnut 2020-mi amerliniarai oqaatigineqarpoq.
Taamaammat paasissutissanut sillimaniarneq iliuuseqarfigineqartariaqartoq, Karl Kristian Kruse isumaqarpoq.
- Immaqa systemi atukkatta illersorneqarnera sakkortusineqarneranik taanna malitseqartariaqarpoq. uagut qarasaasiatigut soorlu ineriartorneq malitsigisaanik atukkavut illersorneqarnerat avataaniit pulararfigineqarsinnaannginnerat suli annertunerusumik pisariaqartikkipput tassani ersippoq. Taannalu isumaqarpunga iliuuseqarfigeqqissagipput, Karl Kristian Kruse oqarpoq.
Ane Lone Baggerip allagaq oqaaseqarfigiumanngilaa. Taanna danskit nunanut allanut tunngasunut ministeriat, Jeppe Kofod (Soc) peqatigalugu amerikamiut nunanut allanut tunngasunut ministeriat, Mike Pompeo naapikkiartorlugu Washintoniliarpoq.
