Danskit nunanut allanut ministeriat allakkat ilumuunngitsut pillugit: Soqutigisariaqanngilavut
Nunanut allanut ministeri Jeppe Kofod (S) naapertorlugu allakkat tamarmik atuarneqartariaqanngillat, taassumami allakkat ilumuunngitsut nunanut allanut naalakkersuisumit Ane Lone Baggerimit allagaritittuusaarneqartut piffissaajaatiginianngilai.
Allakkat ilumoortutut isikkoqarlutik saqqummerput Amerikamilu senatimut ilaasortamut Tom Cottonimut allagaallutik. Tusagassiuutit arlallit naapertorlugit inuit attaveqaqatigiittarfiini arlalinni saqqummersimapput, kisianni ilisimaneqanngilaq ilumut Amerikami senatorimut nassiunneqarsimanersut.
Jeppe Kofodillu piffissaajaatiginianngilaa.
AAMMA ATUARUK Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq
- Ilumuunnginneri erseqqingaarmat soqutigineqartariaqanngillat. Soqutigineqalissappata allattoq anguniagaanik angusitissavarput, tassa piviusorsiortuunngitsumik soqutigineqarnermik oqallinnermillu allamut sangutitsinermik. Silarsuarmi ilumuunngitsunik amerlasuunik nutaarsiassaqarfiusumi inuuvugut, oqarpoq.
Allakkat imaat akerleriiffiulersitsisinnaapput, tassami saqqummermat Kalaallit Nunaat Amerikap siunnersuineratigut siunissami tassaassasoq nuna aaqqissuussinikkut illersornissap tungaatigut kikkunnulluunniit pituttorsimanngitsoq.
AAMMA ATUARUK Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq
Aammalu allassimavoq USA isertortukkut Kalaallit Nunaata pilertortumik namminiilivinnissaq pillugu taasisinneqarnissaanik tapersersuisuusoq.
-Suliat erseqqissumik ilumuunngitsut soqutiginniffigissanngilavut, tamanna naleqqutinngilluinnarpoq. Inuinnaat naalakkersueqataaffiini oqallinnermik aserorterisuupput. Tamakkuninnga allattoq ataasiinnarmik siunertaqarpoq: malugitinniarluni avissaartuutitsiniarlunilu, Jeppe Kofod oqarpoq.
/ritzau/
