Ukioq manna Koda Greenland Awardsimut innersuunneqartut saqqummiunneqarput
Nipilersoqatigiit Small Time Giantsikkut saqqummersitaat "Stethoscope" innersuunneqarpoq, Koda Gramexip allanneratuut torrallataalluinnartumik saqqummersitsisimanertik pissutigalugu innersuunneqarlutik. Naak taalliaat tuluttuujugaluartut kalaallit anersaavat taallianniinnerat nersorniarneqarpoq.
Nipilersoqatigiit Kimia aamma nersorniarneqartunut ilaapput, erinarsortartoq Mike Fencker Thomsen siuttoralugu nipilersortartut erinarsuusiortarnertik pillugu nersorniarneqarnissaat innersuussutigineqarluni.
Nukariit Elsnerikkut nipilersoqatigiivi Nanook nersornaaserneqarnissaat innersuussutigineqarpoq, pingajussaaneerlutik saqqummersitaat "Pissaaneqaqisut" nersornaaserneqaatigissagaat innersuussutigineqarluni.
Aamma atuaruk Kodap nersornaasiuttagai pingasuusaraluartut marluinnanngussapput
2013-imut nersornaat aamma tunniunneqassaaq, siorna taamaaliortoqarsimanngimmat. Erinarsortartoq Kali, erinarsortartoq Katsi Kleist, nipilersortartullu Nuummeersut Rockstones nersornaaserneqartussatut matumani innersuunneqarput.
Isumalluarnartutut nersornaaserneqartussatut innersuunneqartut tassaapput: Nikolaj Lønstrup, Uyarakq - KNR-ip aallakaatittagaani "Tusartaat"-mi aaqqissuisutut aamma ilisimaneqartoq, nipilersortartullu Nuummiut Rockstones.
Leif Saandvig Immanuelsen, Nuuk Posse kiisalu Ulf Fleischer, ataqqisarialimmik ingerlatsisimasutut aamma nersorniarneqarput.
Kikkut nersornaatisissanersut, Imerngalaaq Musik Festivalimi Nuummi pisussatut aaqqissuunneqartumi, januaarip ulluisa 31-anni saqqummiunneqarumaarput.
