Kodap nersornaasiuttagai pingasuusaraluartut marluinnanngussapput
Siulleq tunniunneqartalersussaq tassaassaaq ”ukioq mannamut nersornaat”, aappaalu "isumalluarnartumut nersornaat”, taanna ukioq allortarlugu tunniunneqartassaaq, paarlatsigisassavaa ”ataqqinaammik nersornaat”, aamma ukioq allortarlugu tunniunneqartartussaq.
Juaaka Lyberth Nunatsinni Kodami siulittaasoq tusagassiuutinut taama allagaqarpoq.
Nersornaatit ukiumut tunniunneqartartussat marluinnanngoraluartut, aningaasartaat 25.000-niit 30.000 koruuninut amerlineqarput.
Ukiunut 2013-imut aamma 2014-imut nersornaatissat ataatsikkoortillugit 2015-imi januaarip 31-anni tunniunneqartussat tassaassapput:
”2013-imut nersornaat” aamma ”2014-imut nersornaat - saqqummersitani pitsaanerpaaq, erinniatigut, taalliatigut, aamma nipit nipilersuutillu ataatsimut katiterneqarneranni ukiumi saqqummerfimmini qafasinnerpaamik pitsaassusilik.
2013-14-imilu ”isumalluarnartumut nersornaammi qulequtarineqarluni:
Erinniamini taalliaminilu nutaaliornermigut isumalluarnartoq, saqqummersitsinermigut periarfissanik aqqutissanillu nutaanik ujartuisoq.
2013-14-imilu “ataqqinaammik nersornaat”
Maligassiuisoq, erinniornikkut taalliornikkullu, nunatsinnilu nipilersornerup silarsuaani ataqqisarialimmik ingerlatsisimasoq.
