- Dr. Nils Schmid, qujanaq takkukkavit. Aamma qujanaq sakkutuut umiarsuaat Berlin Kalaallit Nunaannut tikiukkakku.

Nunanut allanut ilisimatusarnermullu naalakkersuisoq Vivian Motzfeldt (S), ataasinngormat Nuummi tusagassiortunik katersortitsinermi Tysklandip illersornissamut ministeriata tullianut taama oqarpoq.

Danmarkip Canada, Norge Tysklandilu Atlantikup avannaani imaatigut isumannaallisaanermik nukittorsaasoqarnissaanik isumaqatigiissuteqarfiginninnerata malitsigisaanik tikeraarneq pivoq.

Taassuma kingullertut taaneqartup Nuummut sialussuarnerani tikikkami DR-ip tusagassiortua timmisartoqarfimmi ima oqarfigaa:

- Tamanna Putinimut Issittumillu sakkutuulersuiniartunut oqariartuutaavoq, Tysklandimi illersornissamut ministerip tullia, dr. Niels Schmid oqarpoq.

Taassuma illersornissaq isumannaallisaanerlu pillugit suleqatini Vivian Motzfeldt (S) illersornissamullu ministeri Troels Lund Poulsen oqaloqatigiinnanngilai, aammali tyskit sakkutuuisa umiarsuaat FGS Berlin illoqarfimmi talissimasoq alakkarterpaat.

Umiarsuaq inuttaalu aggustimi septembarimilu Atlantikup avannaani sungiusarnermut 'Atlantic Bear'-imik taaguutilimmut peqataapput.

Tysklandillu Issittumi nunatsinnilu najuunnerat sungiuttariaqassavarput. Tamanna umiarsuarmi alapernaarsuiffimmi Tritonimi tusagassiortunik katersortitsinermi paasinarsivoq.

Tassani ukiuni kingullerni illersornissamut politikkimut tunngasut uteqattaarneqarput: Issittumi illersornissaq nukittorsarneqartariaqarpoq. Illersornissamut milliardilikkaanik aningaasaliisoqassallunilu atortussat nakkutilliinerillu annertusarneqassapput. Tamakku tamarmik annilaangalersitsinissamik kalerissaarinissamillu siunertaqarput – pingaartumik russinut.

Taamaattumik tyskit aamma periusissiamik tamatuminnga timitaliinissamut ikiuutaassapput.

Ruslandip aarlerinartorsiortitsinera pimoorunneqartariaqartoq, tyskit illersornissamut ministeriata tulliata, dr. Nils Schmidip, Kalaallit Nunaanni innuttaasut ernumasariaqarnersut DR-imit aperineqarami oqaatigaa. Assi © : DR

- Siunissami sungiusarnerit ataatsimullu nuimanerit ingerlatiinnassavavut. Ataatsimuussuserput Kalaallit Nunaata qularinnginniassammagu – tamannalu aamma iliuuseqarnernik tigussaasunik tapersersorneqassaaq, dr. Nils Schmid tusagassiortunik katersortitsinerup kingorna KNR-imut oqarpoq.

Vivian Motzfeldt tusagassiortunik katersortitsinerup kingorna aamma pissarsiaraarput. Ataatsimiinnerup kingorna taanna neriulluarpoq.

- Unammillernartut nalaattakkavut kisermaannagit ataatsimoorluta akiornissaanut nukittuneruvugut, taanna oqarpoq.

- Imarsuarmik avatangiiseqarpugut, taamaattumik isumannaallisaanermut apeqqut uaguinnaanngitsunut tunngavoq, aamma Europami isumannaallisaanermut tunngavoq.

Milliardillit, timmisartut sorsuutillu

FGS Berlin aallaqqaataannaavoq – tyskit sakkutuui Issittumi suli amerlanerusut takussaalissapput. 

Pissutsit erseqqinnerulersinniarlugit annilaangalersitsinissarlu anguniarlugu tyskit sakkutuui imarsiortut aqqartartunik, sorsuutinik timmisartunillu avannarpasinnerusumi inissiiuassasut, dr. Nils Schmid oqarpoq.

Tysklandip nunatsinnut Issittumullu immikkut soqutiginninnera pineqarani NATO-mili ataqatigiissaarineq pineqartoq, illersornissamut ministerip tulliata KNR-imut erseqqissarpaa.

- Tamanna Tysklandip suliassarinngilaa. NATO-p suliassaraa. Taamaattumik avannarpasinnerusumi najuunnerulerpugut, pingaartumik Canadamik, Danmarkimik Norgemillu isumaqatigiissuterput pissutigalugu, dr. Nils Schmid oqarpoq.

Nunanut allanut ilisimatusarnermullu naalakkersuisup Vivian Motzfeldtip (S) ataasinngormat Tysklandimi Danmarkimilu suleqatini ataatsimeeqatigereeramigit oqaloqatigereeramigillu isumalluarpoq. Assi © : KNR

Nunanit allanit illersornissakkut tapersiinerit saniatigut qanittukkut Issittumi Atlantikullu avannaani illersornissamut isumaqatigiissummi immikkoortoq 2 pillugu danskit naalakkersuisuisa, Savalimmiuni naalakkersuisut aamma danskit naalakkersuisuisa isumaqatigiinniarnerat aallarteqqinneqassaaq.

Tassani illersornissamut isumannaallisaanermullu aningaasaliinerpassuit naatsorsuutigineqarsinnaapput.

- Danskit koruunii milliardillit pineqarput, danskit illersornissamut ministeriat Troels Lund Poulsen tusagassiortunik katersortitsinermi oqarpoq.

Vivian Motzfeldt aningaasaliinerit taakku pillugit kingorna aperineqarami itinerusumik oqaaseqanngilaq:

- Isumaqatigiissutit ilisimariikkavut, soorlu umiarsuarnik alapernaarsuisunik nutarterinissaq, silaannakkut nakkutilliinerup annertusarneqarnissaa, dronet aamma Issittumi tunngaviusumik ilinniarneq pingaarnerpaapput, oqarpoq nangillunilu:

- Tamassuma saniatigut sinerissami avinngarusimanerusuni innuttaasut peqataatinnissaat piginnaanngorsarneqarnerunissaallu kissaatigingaarparput.