Danmarkip nunat arlallit Atlantikup avannaaniittut isumannaallisaanermut tunngatillugu suleqatigilerai

Danmarkip Canada, Tyskland Norgelu Atlantikup avannaani nakkutilliilluarnerunissaq pillugu suleqatigilerpai.
Assi © : Ludovic Marin/AFP/Ritzau Scanpix
Allattoq Ritzau
juunip 25-at 2025 08:52

Nunani avannarlerni isumannaallisaanikkut pissutsit annertuseqqaneranni Atlantikup avannaani imaatigut isumannaallisaanermik nukittorsaasussamik Danmark nutaamik suleqateqalerpoq.

Tamanna NATO-p Haagimi ataatsimeersuarnerani pivoq, pingasunngornermi ullaakkut Danmarkip, Canadap, Tysklandip Norgellu suleqatigiilerneranni.

Nunat taakku ilaatigut Atlantikup avannaani sungiusaanernik kiisalu illersornissamut atortunik pisinerit pillugit suleqatigiissapput.

Tamanna illersornissamut ministeriaqarfimmit tusagassiuutinut nalunaarummi atuarneqarsinnaavoq.

- Atlantikup avannaani isumannaatsuunissaq Danmarkimi naalakkersuisunit pingaartinneqarpoq, illersornissamut ministeri Troels Lund Poulsen (V) nalunaarummi oqarpoq.

Peqatigiinneq nutaaq Danmarkip Atlantikup avannaani sumiiffinnik nakkutilliilluarnerusinnaanissaanut ilaatigut atorneqassaaq.

14,6 milliardit aningaasaliissutaasut

Issittumi Atlantikullu avannaani nakkutilliinerup najuunnerullu annertusarnissaanut 14,6 milliardit koruuninik aningaasaliisoqarnissaanik piffissami kingullermi aalajangertoqarsimasoq, ministeriaqarfik erseqqissaavoq.

- Canadamik, Tysklandimik Norgemillu suleqateqarneq tamanna Atlantikup Avannaani isumannaatsuunermut tunngatillugu malunnaatilimmik ukkatarinninnerulersitsissaaq, ilaatigut illersornissap tungaatigut nutaaliorneq illersornissamullu tunngasunik suliffissuaqarneq eqqarsaatigalugit, tamannalu sukkanerusumik, pitsaanerusumik sumiiffimmilu tamatumani sunniuteqarluarnerusumik suliaqarnissamut qulakkeerutaassaaq, illersornissamut ministeri Troels Lund Poulsen nangilluni oqarpoq.

Isumaqatigiissut pingasunngornermi atsiorneqartoq piffissami sivisuumi nunanut allanut politikkimut tunngatillugu pilersaarusiornerup kinguneraa.

Tysklandip illersornissamut ministerianit Boris Pistoriusimit qaaqqusissut tunngavigalugu atuutilersitsineq pisoq, Illersornissamut ministeriaqarfik nalunaarpoq.

Qaaqqusissut Troels Lund Poulsenimik februaarip aqqaneq-aappaanni 2025-mi ataatsimeeqateqarnermi tunniunneqarpoq.