Malittarisassat nutaat allamiunik suliartortoqarusutsitsilissapput - piorsassimassuserli attanneqassaaq

Kalaallit Nunaat sulisoqarnerup tungaatigut ukiuni tulliuttuni unammillernartumiippoq. Taamaattumik akuutitsiniarnermut inatsit nutaaq allamiunik suliartorusutsitsilissaaq, kalaallillu oqaasiinik, piorsarsimassusaannik naleqartitaanillu illersuissalluni.

Allattoq Victoria Julie Schou

aggustip 20-at 2025 14:10

Nutserisoq Tabetha Kreutzmann, Medea Olsen

Nunarput ukiuni qulini tulliuttuni sulisoqarnerup tungaatigut malunnaatilimmik unammillernartumiissaaq.

Taamaattumik Isumaginninnermut, Suliffeqarnermut, Nunamullu Namminermut Avatangiisinullu Naalakkersuisup, Bentiaraq Ottosenip (A), Danmarkimi nunanit allaneersunut akuutitsiniarnermullu ministeri Kaare Dybvad Bek (Socialdemokratiet) peqatigalugu akuutitsiniarnermut inatsit nutaaq ippassaq saqqummiuppaa.

Inatsit nutaaq allamiunik suliartorusutsitsilissaaq, aammali kalaallit oqaasiisa, piorsarsimassusaata naleqartitaasalu qitiuinnarnissaannik qulakkeerinnissalluni.

Peqqinnissaqarfimmi periarfissat nutaat

Suliniutillu pingaarnerit ilaat peqqinnissaqarfimmut tunngavoq.

Nunani allaneersut peqqinnissamut tunngasumik ilinniarsimasut suliaqarfitsik maanna nikisissinnaanngorpaat peqqinnissaqarfimmilu atorfinissinnaanngorlutik - nunami najugaqarsinnaatitaalernissamut piumasaqaatit naapertorlugit ukiuni arfineq-marlunni sulisimanissaq akornutaatinngikkaluarlugu.

Tusagassiuutinillu katersuutitsinermi peqqinnissaqarfik sammineqaqattaarpoq. Innuttaasut ukioqqortusiartornerat tamassumalu ilutigisaanik isumassugassat paarisassallu amerliartornerat peqqinnissaqarfimmut ilungersuatitsivoq.

Aamma atuarukNunarput oqaluttuarisaanermi aatsaat taama sulisussaaleqeqqajaatigaaq – ajornartorsiullu annertusiartortoq

- Nunarput inuiaqatigiit agguataarnerannut ukiunilu tulliuttuni sulisussaaleqisoqalernissaanut tunngatillugu unammillernartumiippoq. Utoqqartatta atugarissaartinneqarnissaat, iluamik kiffartuunneqarnissaat eqqissillutillu utoqqaliartornissaat qulakkiissavarput, Bentiaraq Ottosen tusagassiortunik katersuutsitsinermi oqarpoq.

Nunamittaaq najugaqarnissamut sulinissamullu akuersissutinik siunissami ukiut marluk tikillugit atuuttussanik tunniussisoqalernissaa siunnersuutigineqarpoq, taamaalilluni nunanit allaneersut suliartornissaannut eqaannerusumik periarfissinneqassapput.

Kalaallit piorsarsimassusaat qitiusoq

Suliniutini nutaani kalaaliussutsip qitiutinneqarnissaa Bentiaraq Ottosenip arlaleriarluni erseqqissarpaa.

- Akuutitsiniarnermut inatsimmi nutaami nammineq pingaartitatta, nammineq oqaatsitta namminerlu piorsarsimassutsitta salliunneqarnissaat anguniarparput. Nunatta immikkuullarissusaa malillugu inatsit ineriartortinneqassaaq.

Taamaattumik nunanit allanit suliartortut kalaallit piorsarsimassusaat paasillugulu peqataaffigissavaat, Bentiaraq Ottosen oqarpoq.

- Akuutitsinermi suleqatigiinneq pineqarpoq nunarsuarmi ataatsimoorfilik, ataqqeqatigiinneq paaseqatigiinnerlu.

Aamma atuaruk Naalakkersuisoq: Akuutitsinissamut inatsiseqalissaagut

Inatsisissamik nutaamittaaq suliaqarnermi nunatta angorusutaanik tapersersuineq Danmarkimi nunani allamiunut akuulersitsinissamullu ministerip pingaartippaa.

- Innuttaasut maannga tikittut inuiaqatigiinnut ilanngunnissaannik anguniagaqarnersi tapersersorusuttorujussuuarput, Kaare Dybvad Bek oqarpoq.

Kalaallit inuusuttorpassuit sulisinnaasut suliffeqanngillat. Nunanit allanit suliartortartut amerliartortillugit taakkua katataannginnissaat qanoq qulakkeerneqarsinnaava?

- Inuusuttut sulilernissaannut periarfissanillu pitsaanerusunik pilersitsinissamut tunngatillugu aaqqissuusseqqittoqartariaqarpoq. Innuttaasuttaaq namminneq akisussaaffimmik tigusisariaqarput. Suliffissaqartitsinerli nukittorsarniarlugu ineriartortinniarlugulu nunanit allaneersunik suliartortitsinissaq pisariaqartoq nassuerutigisariaqarparput.

Nunami suliaqarfiit ilaat nunanit allanit suliartortunik pisariaqartitsilluinnarnissaat aarlerinartoqarsoraajuk?

– Suliaqarfiit ilaanni taamaattoqarsinnaavoq. Assersuutigalugu utoqqaat amerliartortillugit sulisussanillu pisariaqartitsinerulernitsinni peqqinnissamik suliaqarfimmi. Nunanit allanit sulisussat tassani pisariaqartippavut. Taamaakkaluartorli aamma kalaallisut oqaatsitta piorsarsimassutsittalu attatiinnarnissaata ukkannissaa pingaaruteqarpoq, Bentiaraq Ottosen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.