Naalakkersuisoq: Akuutitsinissamut inatsiseqalissaagut
- Akuutitsinerulernissamut inatsit suliaralugu aallartittussaavarput. Tassani maani nunatsinni innuttaasut naleqartitaat oqaatsivut – taavalu kulturikkut pigisagut eqqarsaatigalugit, avataaniit tikittut aamma tassunga ilinniartinneqarnissaannut aqqutissamik pilersitsinissaq pingaaruteqartorujussuuvoq.
Suliffeqarnermut naalakkersuisoq, Bentiaraq Ottosen (A), KNR-imit apersorneqarnermini taama oqarpoq.
KNR sulisoqarnermut atatillugu apriilip ingerlanerani tulleriiaanik ilanngutassiorpoq. Fast trackimik aaqqissuussinerup kingunerisaanik Asiameersunik sulisoqarneq, ukiut arfinillit ingerlaneranni pingasoriaammik annertunerulerpoq. Tamannalu sulinermi kulturimut allannguivoq.
Sulisitsisut pisortaata, Christian Keldsenip oqarnera naapertorlugu suliffimmik taarseraakulaneq kalaallit sulisut akornanni kisimi kulturerineqarpoq. Suliffitoqarisalli nuuttunit aalaakkaannerusunit maanna suliffigineqaleratarsinnaavoq.
Maannalu suliffeqarnermi nutaamik aaqqissuusseqqittoqarumaartoq Bentiaraq Ottosenip oqaatigaa.
Inatsit ullutsinnut tulluanngitsoq
Nunatsinni inuit amerlassusaat 2050-imi 20 procentinik ikileriarsinnaanerat Naatsorsueqqissaartarfiup nalilerpaa. Taamatullu utoqqartaasut amerlasuut soraarninngortussanngorlutik.
- Iliuuseqarfiginissaa pingaaruteqartorujussuuvoq. Taamaammat suliat fast-trackimut tunngasut eqqarsaatigalugit ineriartortoqarnissaa, tapersersorneqarnissaalu pisariaqarpoq, Bentiaraq Ottosen oqarpoq.
Sulisoqarnermut inatsit 1992-imi inatsisiliarineqarnikuusoq, 2017-imilu kingullermik allanngortinneqarnikuusoq, Naalakkersuisup erseqqissaatigaa. Kisianni nunaqavissut salliunneqassagunik aaqqissuusseqqittoqartarnissaa pisariaqarsinnaavoq.
- Ullumikkut takusinnaavarput naleqquttoqanngitsoq, taamaammat nutarsaasoqartariaqarpoq aaqqissuusseqqinnerillu nutaat siunissami qaninnerusumi pilertussaassasut oqariartuutigisinnaavakka.
Akuutitsiniarnermut inatsit pitsaanerusoq pisariaqartoq
Isumaginninnermut suliffeqarnermullu naalakkersuisoqarfimmi pisortap, Lona Lyngep fast trackimik aaqqissuussineq sulisussaaleqinermik ajornartorsiuteqarnermik naaperiaanissaq pissutigalugu suliarineqarnikuusoq tassungali atatillugu akuutitsinissaq oqaluuserineqarnikuunngitsoq, KNR-imut apriilimi oqaatigaa.
Taamaammat suliffeqarnermut inatsisip aaqqissuusseqqiffigineqarneranut ilagiussamik nunatsinni tamarmi akuutitsinissamut inatsisiliortoqassasoq, Bentiaraq Ottosen isumaqarpoq. Kommuneqarfik Sermersuup ullumikkut kisiartaalluni akuutitsinissamut politikeqarpoq.
- Akuutitsinissamut inatsit avataanit suliartortut innuttaasunut nunaqavissunut atassuteqartitsissaaq, taakkulu naleqartitatsinnik ilinniassallutik. Taamammat suliffeqarnermut inatsit aamma akuutitsinissamut inatsit misissorneqassapput.
Akuutitsiniarnermut inatsisip suliarinissaa eqqarsaatigalugu qaqugu timitaliisoqassava?
- Pingaaruteqartorujussuuvoq kattuffiit taavalu uani susassaqartut peqataatinneqarnissaat. Tassani allorissaaqatigiinnissarput pingaaruteqartorujussuuvoq suleqatigiinnissarlu tassunga inissinnissaanut aqqutissat atorneqartariaqarput, Bentiaraq Ottosen oqarpoq, nangillunilu:
- Partiit inuiaqatigiillu tamarmik paasisinnaasaannik suliaqartoqarnissaanik alloriaqqinnissamut inatsisiliornissaq pingaaruteqarpoq.
