Suliffissaaleqisut ikilerujussuartut – ajornartorsiutilli takkussuutingajalersut
Suliffissaaleqineq ukiuni kingullerni qulini appariarujussuarpoq – tamannalu ajunngitsuinnaanngilaq.
Inuiaqatigiinnimi suliffissaaleqisuerutissappat sulisussanik amigaateqartoqalissaaq. Suliffissammi illoqarfinni allaniinneri pissutigalugit, nunaqarfinni suliffeqanngitsunut suliffissarsinissaq ajornarsinnaavoq.
Kalaallit Nunaanni naatsorsueqqissaartarfiup kisitsisaatai malillugit 2014-ip 2023-llu akornanni suliffissaaleqisut 65,7 procentimik ikileriarsimapput. Taamaakkaluartoq suliffissaaleqisut ikileriarneri nuna tamakkerlugu naligiimmik agguagaanngillat. Akerlianilli nikerartorujussuupput.
Taamak Isumaginninnermut Suliffeqarnermut Naalakkersuisoqarfimmi immikkoortortami pisortaq Lona Lynge oqarpoq.
- Illoqarfinni suliffissaaleqisut procentii qiviaraanni ikinneerarsuusut takuneqarsinnaavoq, akerlianilli pingaartumik isorliunerusuni, suliffiit amigaataaneri pissutigalugit, suliffissarsiortut amerlanerujussuullutik.
Agguagaanerat equngasoqartoq
Suliffissaaleqisut procentii pingaartumik illloqarfinni anginerusuni ikinnerpaaffissaminniipput. Nuna tamakkerlugu agguaqatigiissinnerat 4 procentimiippoq. Nuuk, Ilulissat Uummannarlu 2023-mi 2 procentimiipput.
Nunattali ilaani taamak qiimmatsaatigineqarsinnaanngilaq. Tassami Tasiilami eqqaanilumi suliffissaaleqisut 11 procentiullutik amerlanerpaapput, malitsigalugit Kangaatsiaq 10 procentimiittoq, Paamiut Narsarlu 9 procentimiittut.
Assersuutigalugu Tasiilami suliffissaaleqineq nalinginnaasumik suliffissaqannginnermut peqqutaavoq. Taama Naalakkersuisut suliffeqarnermut nalunaarusiaat 2023-meersumi allaqqavoq.
Kalaallit Nunaanni Sulisitsisuni pisortaq Christian Keldsen aamma taamak eqqarsaateqarpoq. Taanna aamma nunatsinni sulisinnaasut ilinniarsimanngitsut ilinniarsimasullu pisariaqartinneqartut isumaqarpoq. Inuiaqatigiinnili ilinniartitaanerup qaffanneqarnissaa siunissami pisariaqartinneqalertussaavoq.
- Inuiaqatigiinnimi ilinniartitaaneq, ilinniartitaaneq, ilinniartitaaneq suliniutiginerusariaqavissorparput – aamma suliffissaaleqineq, sulisoqarneq inunnillu assigiinngisitsinerit eqqarsaatigissagutsigit.
Sulisoqarneq ukiuni makkunani allannguuteqarujussuarpoq. Tamanna Christian Keldsenip uparuangaatsiarpaa. Taamaammat inuiaqatigiit akornanni ilinniakkat atorfiillu suut pisariaqartinneqarnersut pillugit, nunaniillu allaniit sorlernut sulisussarsiornissaq pisariaqartinneqassanersoq, nuna tamakkerlugu oqaloqatigiittoqarnissaanik aallartitsisoqartariaqarpoq.
- Oqaloqatigiinneq taamaattoq nunatsinni amigaatiginaatsiarparput. Suut nammineerluta pikkoriffigissanerivut paasisallugu pissusissaminiippoq – tamannalu suliniuteqarnermik pisariaqartitsiviussaaq, Christian Keldsen oqarpoq.
