Kangiamiut marloriaataat sinnerlugit amerlanerulersut – politikerilli ataatsimik pingaarutilimmik puigugaqarsimasut
Nunarput ukiualuit ingerlanerinnaani innuttaasut katitigaanerannut tunngatillugu allannguiffiungaatsiarpoq.
Fast trackimik aaqqiissut 2021-mi atuutilersinneqarpoq, taanna suliffeqarfiit sulinermut akuersissummik nalinginnaasumik avaqqussisinnaanissaannut periarfissiivoq, taamaalilluni sulisup atorfeqarnera suliffeqarnermi soorlu isumaqatigiissutinut piumasaqaatinut naapertuutsinneqarluni.
Taamaaliornikkut inuussutissarsiornermi sulisussanik pisariaqartunik nunatsinnut pilerisaasoqarsinnaalluni – pingaartumik nunaqavissut atorfimmut ilinniagaqarfigisimanngisaannut imaluunniit suliffimmut nunaqavissunit suliffissarsiorfigineqanngitsunut tunngatillugu.
Kangiami nunanit nunatsinni najugaqalersimasut 2019-mit 2025-mut 210 procentimik tassa 573-init 1774-inut amerlipput. Suliffeqarfiillu pingaartumik kiffartuussinerit, aalisakkeriffiit, pisiniarfiit sanaartorfiillu Europap avataanit sulisussarsisarput.
Suliffeqarfeqarnermi inuit 1000-it missaanniittut amigaatigineqartut KNR-ip siusinnerusukkut nassuiaatiginikuuaa.
Taamaattorli fast trackimik aaqqiissut ajornartorsiutitaqarsinnaavoq.
Patajaanneq aalajaatsuunerlu
Sulisitsisut pisortaata, Christian Keldsenip fast trackimik aaqqiissut suliffeqarnermi kulturimik sulisartunut qanoq allannguisimanera oqaatigaa. Taassuma siusinnerusukkut suliffiit suliffimmut nikeqattaarneq nalinginnaalluinnarsimasoq nassuiaatigaa.
- Suliffeqarfimmi inuup ataatsip ukiup ataatsip ingerlanerani tallimariarluni atorfininneqartariaqarsimanera assersuutigineqarsinnaavoq. Tamanna nunarsuarmi pisartuni nalinginnaanngitsorujussuuvoq. Nunatsinnili inuup ataatsip ukiup ataatsip ingerlanerani suliffimmit suliffimmut nuuttarneratigut suliffeqarfimmut arlaleriarluni atorfinitsinneqarnera qaqutigoortuunngilaq.
- Sulisut suliffimmit suliffimmut nikittaartarnera suliffeqarfimmut naalliunnangaatsiarpoq. Tamanna ilisimasaqarnerulernissamik pilersitsiffiunanilu suliffimmi avatangiisinut pitsaasuliornerunngilaq.
Suliffimmi kultur ullumikkut suli taamaappoq; kisianni allanngoriartorpoq. Sulisuusimasormi suliffimminut uteqqinniaraangami atorfik fast trackimik aaqqiissut atorlugu inuttalerneqarsimanera paasisinnaasarpaat.
- Avataanit sulisussarsioraangatta najugaqarnissamut akuersissutaat suliffeqarnermut akuersissuteqarfigineqarneranut pituttorsimasarpoq. Taamaammat taakku assinganik suliffimmit nikeqattaarneq ajorput. Taamaammat nunatsinni sulisutut siusinnerusumi periarfissaqarnerugaluartoq inunnik allanik atorfinitsitsisoqartalerneratigut maanna periarfissakinneruvoq, Christian Keldsen oqarpoq.
- Suliffimmi sumiluunniit avataanit sulisoqarnermit nunavissunik sulisoqarnissaq pingaarnerutinneqarpoq. Sulisitsisutta nunaqavissut piginnaasaannik atuerusunnerupput. Kisianni aamma ingerlatassatsinnik suliffeqarfeqarpugut, taakkulu patajaatsoqarnissaanik pisariaqartitsipput.
Sofie Svendsen Nuummi SIK-p immikkoortortaqarfiani siulittaasuuvoq. Taanna aaqqiissutip nunaqavissunut atugassarititaasut appartinngikkai isumaqarpoq.
Taassumali nunanit allanit sulisut inuiaqatigiinnut akuutinneqalernissaannut periusissiamik amigaateqartoqartoq erseqqissaatigaa, sulisut taakku taamaaliornikkut isummanik pigiliutiinnakkanik uumissorneqarnermillu nalaataqassanatik.
- Eqqaamasariaqarparput fast trackip atuutilernerata kingorna periusissiornikuunnginnerput taanna, qanoruna atugassaqartissasut, qanoruna uatsinnut akuutinneqarsinnaasut, maannga tikilluaqqusaagunik taava qanoq aamma atugassaqartitaassappat, kalaaleq ajornerussanngilaq, kangiamioq ajornerussanngilaq, tamarmik atorfissaqarteqigatsigit maani.
Ilanngutititsineq amigaataasoq
Fast trackimik aaqqiissut atuutilersinneqarmat nunatsinni sulisussaaleqinerujussuaq iliuuseqarfiginiarneqarpoq. Tamanna isumaginninnermut suliffeqarnermullu naalakkersuisoqarfimmi pisortap, Lona Lyngep oqaatigaa.
Nunanilli allanit sulisut qanoq amerlatiginissaat qanorlu sukkatigisumik amerliartornissaat oqaluuserineqanngilaq.
- Suliffissaaleqisut kisitsisaat qaffakkiartoqqilissappat fast trackimik aaqqiissutip qaqugu atorunnaarsinneqarnissaa oqaluuserineqarneruvoq.
Sofie Svendsenip fast trackimik aaqqiissut ajoriffissaqartinngilaa. Taassuma nunatta nunanit allanit sulisussat pisariaqartikkai isumaqatigaa. Kisianni nunarput ilanngutititsinissamut politikkimik pisariaqartitsisoraa.
- Fast trackimik eqqussisoqarmat eqqarsaatigineqarsimavallaanngilaq kingunerani qanoq aaqqissuinissaq, pilersiinnarlugu pilersiinnagaavoq, kinguneranik soqanngilaq. Integrationspolikkeqanngilagut, tassa akuutitsinissamut politikki taanna amigaataasupilupilussuuvoq. Pilersitsipallannerusutut immaqa taaneqarsinnaavoq pissutigalugu kingunissaaniluunniit akuutitsinissamut politikkeqarata, qanoq iliuuseqarnissamut pilersaaruteqarata tassa takutitsineruvoq taanna massakkut atulissasoq, taanna oqarpoq.
Sofie Svendsenilli naalakkersuisunngortut Inatsisartunngortullu fast trackimik aaqqiissutip atuutilersinneqarneratulli – aaqqiissutissarsiupallannermik mianersuussinissaat pingaaruteqartoq erseqqissaatigaa.
- Naalakkersuisut Inatsisartullu eqqaamasariaqarpaat pipallatamik iliuuseqannginnissaq, sulisartunut annermik aamma tunngatillugu, SIK-p immikkoortortaqarfiani siulittaasoq oqarpoq.
