Politiit ullormut nalunaarutaat: Nuummi inuusuit kinaassusersineqanngitsut inuk saassukkaat

Nuummi Katersortarfiup nalaani inuusuttorpaaluit inummik marlunngornermi unnukkut saassussisut, Kalaallit Nunaanni politiit paasissutissiipput.

Allattoq Nicole Sander Bertelsen

aggustip 20-at 2025 08:49

Nutserisoq Karla Heilmann

Nuummi aqqusinermi inuusuttorpaaluit – 18-it inorlugit ukioqassangatinneqartut – marlunngornermi unnukkut inummik saassussisimapput.

Saassussineq illoqarfiup qeqqani oqaluffiup Katersortarfiullu akornanni pisimavoq, pigaartut pisortaat Aputsiaq Hansen oqarpoq.

- Inuusuit pinerlisut inuk ataaseq nunami nalasoq tukkarsimavaat, pigaartut pisortaat oqarpoq.

Politiit pinerlisuni ataaseq kinaasinnaaneranik ilimatsaassaqarput, pisumulli atatillugu tigusarinninngillat.

- Soorunami inunnik, pisumik ippassaq unnukkut nalunaaqutaq qulingiluat qulillu akornanni takunnissismasinnaasunik oqaluussaqarusuppugut, Aputsiaq Hansen oqarpoq.

Saassussiqarnerata kingorna pinerlineqartoq Sanamukaanneqarpoq, pigaartulli pisortaata pinerlineqartup saassutsereernerata kingorna ullaaq manna qanoq innera ilisimanngilaa. Saassussinermut suna pissutaasimanersoq suli erseqqinngimmat, suliarlu nakuusersimasutut misissuiffigineqalersoq, taassuma aamma oqaatigaa

- Nakuusernerit politiinit suliarineqartorujussuupput, Aputsiaq Hansen naggasiivoq.

Ulloq unnuarlu kingulleq nakuusernerittaaq allat pingasut nalunaarutigineqarput. Ataaseq Nuummi Qaqortumilu marluk.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.