Israelip saassussisoqaqqinnginnerani sakkutuussat 60.000-t aggersarniaraat

Sakkutuussat 60.000-t Israelip sakkutuuinut peqataasussatut Gazami saassussisoqaqqinnginnerani piffissami qaninnermi aggersarneqassapput.  
Aggersaaneq Israelip illersornissamut ministeriata, Israel Katzmimit akuerineqarpoq. 

Tamanna israelip illersornissamut ministereqarfianiit nutaarsiassaqarfimmut AFP-mut pingasunngornermi ullaakkut uppernarsarneqarpoq.

Tamanna ilutigalugu sakkutuut Gazap illoqarfianik tiguaanissaat ministereqarfimmiit akuerineqarpoq, Israelimi illersornissamik suliallit Gazap illoqarfianik tiguaanissaq imminut illersornissamut pilersaarutip ilagissagaa aggustip aallartinnerani aalajangereeraallu.

Sakkutuussanik aggersaaneq israelimi tusagassiuummit Times of Israelimit ullaaq manna saqqummiunneqarpoq. Illersorneq pillugu paasissutissiisartut atitalerneqanngitsut, paasissutissanik uppernarsineqanngitsunik aallerfiusimasut, tusagassiutip saqqummiussinermini innersuutigaa.

Saassussinermi peqataallutillu sakkutuunik taarsiisut

Sakkutuussanik aggersaaneq Times of Israel naapertorlugu ingerlaannaq atuutsinneqarnavianngilaq. Sakkutuussat suliartunnginnerminni minnerpaamik sapaatit akunnerini marlunni periarfissinneqartarput. 

Tusagassiuut naapertorlugu sakkutuussat 60.000-t missaanniittut aggersarneqarunik tamaavimmik Gazap illoqarfiani saassussinissamut peqataassanngillat. 
Ilai sakkutuunik Gazami piffinni allani inissinneqarnikunik taarsiisussaassapput.

Israel Katzip  Eyal Zamir, Israelip sakkutuuini generalit pisortaat, marlunngornermi allat peqatigalugit ataatsimeeqatigeereersullu, sakkutuussanik aggersaanissaq tusarliunneqarpoq.

Times of Israel naapertorlugu atorfilittat nuimasut israelimilu illersornissaqarfiup isertortumik paasiniaasartui Shin Bet ataatsimiinnermi, sakkutuut Gazap illoqarfianik tiguaanissamik pilersaarutaannut tunngasumi, aamma peqataasimapput.  

Israelimi atorfilittat naapertorlugit pilersaarutit, Gazap kujasinnerusortaani inunnik ikiuinissamut aaqqissuussinerit sakkutuuniit aallartinneqarnissaannik malitseqassapput. Assersutigalugu toqqit innuttaasunullu atortussat assigiinngitsut Gazamut ulluni kingullerni eqqussuunneqarput.

Tamatuma kingorna israelip sakkutuui, inunnik 1 millionit missaanniissorineqartunik Gazap illoqarfianiittunik qimarngutitsinissamik naalakkiissuteqassapput.

Illoqarfiup qimannissaanut palæstinamiut 7. oktober 2025-p tungaanut periarfissinneqarumasimanerat Times of Israelimiit siornatigut allaaserineqarnikuuvoq

/ritzau/