USA Syriami aporaattoqareernerani suliniuteqartoqarnissaa pillugu isumaqatigiissummik nalunaaruteqartoq

Syriami ullut arlallit aporaattoqareernerata kingorna “suliniutinik immikkut ittunik” isumaqatigiinnermik angusaqartoqartoq, USA-p nunanut allanut ministeriata Marco Rubiop pingasunngornermi unnukkut nalunaarutigaa.

- Syriami aporaattoqarnerani illuatungeriit peqataasut tamakkerlugit ilanngutitippavut. Pisumut tamatumunnga aarlerinartumut ajorluinnartumullu, unnugu soraarussiniarluta immikkut ittunik suliniuteqarnissaq pillugu isumaqatigiippugut, taama inuit attaveqaqatigiittarfiatigut X-imi allappoq nangillunilu:

- Illuatungeriit tamakkerlutik pisussaaffiit arlallit naammassisinnaasariaqassavaat, taamaaliornissaallu naatsorsuutigilluinnarparput.

Illuatungeriit sunarpiaq pillugu isumaqatigiissuteqarfigisimaneraat ministeri itisiliinngilaq.

Syriami sumiiffippassuarni piffissami kingullertigut akiuunnernik eqqissiviilliortunillu naalliunnartorsiorfiusimavoq

Israel saassussisoq

Syriap kujasissuani illoqarfimmi Sweidami druserit muslimillu sunnit ilaqutariikkaat angalaannartut akornanni sapaatiummalli aporaattoqarpoq.

Tamatuma malitsigisaanik naalagaaffiup sakkutuui akiuunnernut aamma ilanngupput. Nutaarsiassaqartitsivik AFP naapertorlugu Syriami aqutsisut oqaatigaat, sakkutuut “sakkuakkunnaarnermik nakkutilliiartorlutik” isertertut, kisianni isiginnittut naapertorlugit naalagaaffiup sakkutuui angalaannartunut ilanngussimapput.

Sweidami beduinit angalaannartorpaallu ukiorpassuarni akerariipput. Ilaanni peqqarniitsumik aporaassinnaasarput.

Druserit araberiupput upperisamikkut ikinnerussuteqartuusut, annerusumik Syriamiittuusut, Libanonimiittuusut aamma Israelimittuusut. Beduinit araberit angalaannartunik ataatsimut taaguuteqarput, araberit inoqajuitsuani najugaqartut.

AFP naapertorlugu aporaannerni inuit 300 missaanniittut toqunneqarsimasut, Syriami Inuit Pisinnaatitaaffiinik Nakkutilliisut Sohr pingasunngormat siuliani nalunaaruteqarput.

Nunami pisoqarnera Tuluit Nunaannit Nakkutilliisunit nakkutigineqarpoq.

Tamanna ilutigalugu Israeli Syriamut ullorpaalunngortuni saassussisaqattaarpoq. Illuatungeriit pisussaaffinnut isumaqatigiissuteqartut sorliit ilanngussimanersut, Rubiop X-imi itisilinngilaa.

Syriami illoqarfiit pingaarnersaanni Damaskusimi præsidentip illorsuata nalaani “sakkutuulersornikkut saassutassaqqissoq” saassunneqarsimasoq, Israelip sakkutuuisa IDF pingasunngormat siuliani nalunaarutigaa.

/ritzau/