Borgmesteri Ukrainemi saassussisoqaqqereersorlu: Putin sorsukkunnaarusunngilaq

Ukrainep nunataata ilaani Poltavami, Krementjukimut Lubnymullu marlunngornerup unnuaani russit silaannarmit saassussinerata kingorna, innuttaasut untritilikkaat sarfaarunnermik eqqugaapput. 

- Russit præsidentia Vladimir Putin sorsukkunnaartoqarnissaanik soqutigisaqanngitsoq saassussinerup takutippaa, Krementjukimi borgmesteri oqarpoq. 

Nutaarsiassaqartitsivik Reuters taama allappoq.

- Putin sorsukkunnaartoqarnissaanik kissaateqanngitsoq nunarsuarmut takutinneqaqqiinnarpoq. Ukraine sequmikkusuppaa, borgmester Vitalij Maletskyj allaqatigiittarfimmi Telegramikkut allappoq.

USA-p præsidentianik Vladimir Putin Alaskami ataatsimeeqatiginninnerata kingorna saassussineq pivoq, tassanimi Ukrainemi sorsunneq sorsunnerullu qanoq unitsinneqarsinnaanera eqqartorpaat.

Ataasinngornermi Trumpip Ukrainep præsidentia Volodymyr Zelenskyj Europamilu siuttut arlallit Det Hvide Husimi ataatsimeeqatigai.

Ataatsimiinnerup ingerlanerani USA-p præsidentiata Putin oqarasuaatikkut oqaloqatigaa.

- Putinip eqqissineq kissaatigalugu oqarasuaatikkut Trumpimut neriorsuilluni oqarnerata nalaani præsidentip Volodymyr Zelenskyjip eqqissineq naapertuilluartoq pillugu Europami siuttunik Det Hvide Husimi oqaloqatiginnippoq, tamatumalu nalaani Putinip sakkutuui Krementjukimut annertuumik saassussipput, illoqarfiup borgmesteria allappoq.

Ajoqusertoqanngitsoq

Marlunngornermi ullaap tungaani russit illoqarfinnik Poltavamiittunik saassussineranni inunnik ajoqusertoqarsimanersoq toqusoqarsimasorluunniit nalunaarutigineqanngilaq.

Poltavap guvernøria Volodymyr Kohut illoqarfimmi ingerlatseqatigiiffik sarfalersuisoq ajoqusersimasoq Telegramimi allappoq.

Saassussinerup kingorna Lubnymi inuinnaat 1500-t suliffeqarfiillu 119-it sarfaaruttut, guvernøri oqarpoq.

Ruslandimi naalakkersuisut saassussineq pillugu oqaaseqarsimanngillat.

Poltava Ukrainep qeqqaniippoq.

/ritzau/