Tusagassiuut: Isertorluni immiussineq pillugu suliami, Naleraq Siumumiit 40.000 kronenik akilerneqarpoq

Suliami isertorluni immiussisarsimanernut nipangiusimasussaatitaanermillu unioqqutitsinemut tunngasumi, Siumut Naleqqamut 40.000 kronenik akiliisariaqarsimavoq, Sermitsiaq.ag allappoq.  

Tamanna Naleqqap naatsorsuutaanni 2024-moortumi Sermitsiaq.ag-miit takuneqarsimasumi ersersinneqarpoq. 

- Tusagassiorfiit aqqutigalugit saqqummiunneqareersutut, tamanut ammasumik annertuumik unnerluutiginnittoqartarsimavoq, tamatumalu malitsigisaanik Naleqqami Inatsisartuni ilaasortaatitagut illersorniarlugit eqqartuussissuserisunik sullinneqarnermut aningaasartuutinik akiliisariaqarsimavugut, Sermitsiaq allappoq.

Isertorluni videoliaq unnerluussissutigineqartoq

Naatsoorsuutini allaqqasut naapertorlugit, Naleqqamiit inatsisartunut ilaasortaq Jens Napãtôk, nipangiusimasussaatitaanerminik unioqqutitsisimasutut Siumumiit 2024-mi pasillerneqarnerata kingorna, aningaasat eqqartuussuserisumit ikiorneqarnermit aningaasartuutaasimasunut matussusiinissamut atorneqarput.

Jens Napãtôk oqaluussaqarnerani isertortumik videokkut immiussaq pasilliinermut tunngaviuvoq, immiussarlu Siumumi siulittaasuusimasup aninaasaqarnermullu naalakkersuisuusimasumit Erik Jensenip, Jens Napãtôk nalusaanik immiussarisimagaa, kingusinnerusukkut paasineqarpoq.

Inatsisartuni siulittaasoqarfiup Jens Napãtôk-mut suliaqartoqarnissaa taamani itigartitsissutigaat, kinguninngualu Naleqqamiit eqqartuussuserisunut aningaasartuutaasimasut Siumumiit matussuserneqarnissaat partiit isumaqatigiissutigaat.

Taamaalillutik illuatungeriit suliaq eqqartuussivikkoorunneqarnissaa pinngitsoortippaat.

Pele Broberg: Suliaq naammassineqanngilaq

Naleqqamili siulittaasup, Pele Brobergip, suliaq qaangiussimasutut suli isigilinngilaa.  
Inatsisartut siulittaasoqarfiata Inatsisartunut ilaasortat tunngavissaqanngitsumik saassunneqarnissaannut illersuinissartik saperaat, taamaattoqarneratalu suliamit ersersinneqarnera, Pele Broberg isumaqarpoq. 

- Suliap takutippaa Inatsisartuni siulittaasoqarfik Inatsisartuni ilaasortat ataasiakkaat illersornissaannut suliassaminnik naammassinnissinnaasimanngitsoq, tamannalu pissutigalugu partiitut siulliulluta iliuuseqartariaqarsimavugut, Pele Broberg Sermitsiamut oqarpoq.

Tamannalu ilutigalugu, kina akiligassamik akiliissanersoq - Erik Jensen nammineq imaluunniit partii Siumut - suli aalajangerneqanngilaq, Sermitsiaq allappoq.