250 millionit koruunit sinnerlugit akileraartartunut utertinneqangajalersut

Innuttaasut 32.743-it 2024-mi akileraarpallaarsimasut ukioq manna utertuussapput.

Innuttaasulli 3.526-t akiliinikippallaarsimasut akiligassinneqassallutik.

Akileraartarnermut Aqutsisoqarfik tusagassiuutinut nalunaarummi allappoq.

Inaarutaasumik naatsorsuummi e-Boksinnut aqagu takkuttussami akiligassaqarnerlutik utertuussanerlutilluunniit takusinnaalissavat. Inaarummik naatsorsuut Sullissivik.gl-imi 'Akileraarutikka' iserfigalugu aamma takuneqarsinnaalissaaq.

Akileraartarnermut Aqutsisoqarfik akileraartartunut ukioq manna katillugu 253,1 millionit koruuninik utertitsissaaq. Tamatuma saniatigut sulinermut ilanngaammit katillugu 94,7 millionit koruunit utertinneqassaaq.

Sulinermut ilanngaammit pisarnerlutit inaarummik naatsorsuutini aamma allassimassaaq.

NemKontoqarnissaq pisariaqartoq

Aningaasanik utertuussaguit aningaasat Nemkontonnut aggustip 29-anni toqqaannartumik ikineqarumaarput. Aatsaalli NemKontoqaruit, Akileraartarnermut Aqutsisoqarfik paasissutissiivoq.

- NemKontoqanngikkuit akileraarpallaarutivit tunniunneqarnissaat utaqqisikkallarneqassapput. NemKontoqanngikkuit pilersitsisariaqarputit, Aqutsisoqarfik allappoq.

NemKontomik pilersitsereeruit Akileraartarnermut Aqutsisoqarfimmut attaveqarlutik tamanna ilisimatitsissutigissavat. Aningaasallu tamatuma kingorna ikineqarumaarlutik.

2024-mili akileraarnikippallaarsimaguit – ernialiussamilli 6 procentimik sipaaruteqarusukkuit – akiligassaq ukioq manna novembarip 20-at nallertinnagu akileeriissaatit. 

Qanoq iliornissamut paasissutissat uani atuarsinnaavatit.

Inaarummik naatsorsuutit, akileraartarneq assigisaalu pillugit apeqqutissaqaruit Akileraartarnermut Aqutsisoqarfimmut oqarasuaammut 34 65 10-mut imaluunniit mail-ikkut: tax@nanoq.gl attaveqarsinnaavutit.