Takornarialerisut naammagittaalliortut: Ammaaqqinneq takornariaqarnermut ajalusoortitsissaaq
Ataasinngormat nunarput avammut mianersortumik ammaqqippoq.
Tamanna Danmarkimi coronavirusip tuniluutipiluulerneranik kinguneqartumik Kalaallit Nunaata matuneqarneranik kinguneqarpoq.
Nunatsinnut tikittut tamarmik ulluni tallimani angerlarsimaannaqqusaanerannik maleruagassat suli allanngortinneqaratik
atuupput. Akiuussuserneqarsimagaluaraanniluunniit: Akiuussutissat tamarmik pisimagaluaraanniluunniit angerlarsimaannarnissamik ullullu tallimassaanik misissorteqqinnissamik maleruagassaq suli atuuppoq.
Angerlarsimaannaqqusaanermut maleruagassat
- Kalaallit Nunaannut tikikkuit ullut tallimat angerlarsimaannaqqusaavutit
- Ullut tallimassaani misissorteqqissaatit
- Angerlarsimaannaqqusaanivit nalaani pisuttuarsinnaavutit, najugaqatitit attaveqarfigisinnaavatit niuerniarsinnaallutillu
- Niuerniarninni assiaquteqarnissaq piumasaqaataavoq
- Pulaasanngilatit, pulaartoqassanngilatit, ataatsimoorfiusuniisanngilatit, bussissanngilatit, taxassanngilatit suliartornalluunniit
- Ullut tallimassaani misissortinnianngikkuit, tikinnermiit ullut 14-it angerlarsimaannassaatit.
Tamanna takornarialerisuninngaanniit naammagineqarunnaarpoq.
- Takornariaqarneq pillugu inuussutissarsiuteqartut aasanerani ajalusuussapput. Ammaaqqinnissamut maannakkut pilersaarut sumiiffinni inuussutissarsiortunut aningaasatigut annaasaqaataassaaq, Jesper Schrøder, inuussutissarsiortut kattuffiani Arctic Circle Business-imi pisortaasoq oqarpoq.
- Ulluni tallimani angerlarsimaannaqqusaaneq taamaaqataanillu nunap matugallaqqittariaqarneranut nalornisoorsinnaaneq Kalaallit Nunaannut takornariarusullutik inniminniineerusuttunut akornusiissaaq. Takornaqarnermik inuussutissarsiuteqartut amerlanerit aasaanerani aamma ukiarnerani ingerlalluarnissaraluanut susoqarpiannginneranut ajalusoortitsissaaq. Takornariaanerusunut sanalugaanerusunik pisiniarfiit eqqugaanerussapput, akiliisinnaajunaarsinnaallutillu, taakkununngami ikiorsissutit ukioq nutaarli aallartimmat ilaanngimmata.
Suliassarput pilersaarusiorsinnaanngilarput
Tamanna Karl Jørgen Enoksenimiit isumaqatigineqarpoq, taanna Sisimiuni takornarialerisuuvoq.
Karl Jørgen Enoksen. Assi: KNR
- Pilersaarusiorsinnaannginnatta uggornarpoq. Qujanartumik ammaqqikkiartuaaraluarpoq, kisianni pitsaanerusumik pilersaarusiortoqarsinnaagaluarpoq.
AAMMA ATUARUK Nunatta avammut ammaqqinnera Sisimiuni ernummataavoq
- Angerlarsimaannaqqusineq suli atuutinneqarallassagunarpoq. Naluneqarporli qanoq sivisutigisumik. Tamanna pissutaalluni takornarianik tikittoqanngitsuussaaq. Aalajangersimannaagaluarparput akiuussuserneqarsimasut angerlarsimagallaqqusaasariaqanngikkaluartut, Karl Jørgen Enoksen oqarpoq.
- Akunnattuungasoqarpoq. Pisiniarniarsarigaluarlutik takornariarnissamik. Ullunik tallimanik karantænertariaqarneq pissutaalluni akunnattuungasoqarpoq, pisinaveersaartoqarpoq. Taamaalilluni uagutsinnut annaasaqaataasussanngorluni.
Kangerlussuarmi?
Jesper Schrøder eqqarsaatersuuteqarpoq. Nunatsinnimi sumiiffiup ilaanni kissaatigisaminnik inuit ilaat akiuussuserneqareerput.
- Soorlu Kangerlussuarmiut tamarmik akiuussutissamik kapitinneqariissasut, taamaattoqarneranimi killilersuutit annikillisarneqarsinnaammata. Ukioq kingulleq paasineqareerpoq uninngagallarnissamut piumasaqartoqarnerani pinngortitaq atorluarneqarsinnaasoq, taanna oqarpoq.
Inuit 600-t Air Greenlandimut ilaallutik nunatsinnut tikissinnaapput, sapaatit akunneranut timmisartuussinerni piingasuusuni timmisartuussinermi ataatsimi inuit 200-t ilaasinnaallutik.
AAMMA ATUARUK Nunatta septembarimi ammavinnissaa neriuutigigaat – amerlanerujussuilli akiuussuserneqarsimassapput
600-llu kisimik misissortissinnaapput - tassalu taamak amerlassuseqartussaapput angalaniartut, sapaatit akunneranut kapitissinnaatitaasut taakkuummata.
Ullumikkut allaanerussut uaniippoq, nunatsinnut avataaneersunik isertoqassatillugu Coronamut allattoqarfik akuersissuteqartarunnaarnikuummat. Coronamut allattoqarfik matusisoqarnerata nalaanili taamaaliortaraluarpoq, decembarip naanissaata tungaaniit ippassaq tungaanut.
Killilersuinermut appaaneq maajip 31-iata tungaanut atuuppoq.
