Nunatta ammaativinnissaaq aasap kingornanut utaqqisinneqartariaqarpoq. Tassungalu qanoq amerlatigisut akiuussuserneqarsimarusussanersut aamma apeqqutaassallutik.Assi: Scanpix

Nunatta septembarimi ammavinnissaa neriuutigigaat – amerlanerujussuilli akiuussuserneqarsimassapput

50-ileereersimasut tamarmik akiuussuserneqarsimalerpata nunatta ammavinneqarnissaa Naalakkersuisut oqaluuserilissavaat. Maannakkulli amerlavallaartut akiuussuserneqarnissamut qujaannartarput.

Nunatsinnut angalasunut killilersuiffiunani nunatta ammavinnissaa aggustip septembarilluunniit qaammataani piviusunngorsinnaavoq.

Tamanna Naalakkersuisut siulittaasortaavata, Múte B. Egedep neriuutigaa.

Kisianneqarporli: Qanoq amerlatigisut akiuussuserneqarumanersut nunatta ammavinnissaanut apeqqutaavoq.

- Aggustimi septembarimiluunniit ammaanerunissaq neriuutigaarput – kisianni qanoq amerlatigisut akiuussuserneqarsimanersut apeqqutaavoq, Múte B. Egede oqarpoq.

Nunatsinni Danmarkimilu akiuussutissamik kapuineq

Nunatsinni: 12,5 procentit siullermeertumik kapitereerput.

7,5 procentit naammassillugu kapiteerput.

80 procentit siullermeertumik suli kapitinneqanngillat.

Danmark: 22,4 procentit siullermeertumik kapitereerput.

11 procentit naammassillugu kapitereerput.

78 procentit siullermeertumik suli kapitinneqanngillat.

Nunatsinnukartut sapaatip akunneranut 600-t corona pillugu allattoqarfimmit akuersissuteqarfigineqaqqaaratik ataasinngorpamit tikissinnaalernissaat Naalakkersuisut ullumi ammaappaat.

Nunatsinnukartulli Immersugassamik-Sumumik suli tunniussisassapput aamma nunatsinnut aallariartornissaminnut sivisunerpaamik akunnerit 72-t iluinni misissortissimassallutik nunatsinnullu tikinnerminnit ulluni tallimani angerlarsimaannartassallutik.

Nunatta ammaativinnissaaq aasap kingornanut utaqqisinneqartariaqarpoq. Tassungalu qanoq amerlatigisut akiuussuserneqarsimarusussanersut aamma apeqqutaassallutik.

Amerlavallaat illersuuteqanngitsut

Nunatsinni siullermeertumik kapitissimasut katillugit 8.867-iupput, naammassillugulu kapitissimasut 5.572-iullutik. Nakorsaanerullu, Henrik L. Hansenip oqarnera naapertolugu 50-ileereersimasut tamarmik kapitissimanissaat anguniagaavoq.

Danmarkimi aamma taava anguniagaqartoqarpoq – Naalagaaffeqatigiit kujasinnerusortaani 50-ileereersimasut tamarmik akiuussutissamik kapitissimalerpata ammaasoqarnissaa aamma pilersaarutaavoq.

- Maannakkutut isikkoqartillugu akiuussusersuineq aggustimi naammassissavarput. Akiuussutissamilli kapitinniartut nikerarput. Nunatta kujataaneeqqammerpugut tassanilu pingasuugaangata marluinnaat neqeroorummut akuersisarput. Taamaammat amerlavallaartut illersuuteqanngillat, tunillaassuuttoqalernissaanullu qulakkiissagutta tamanna naammanngilaq, nakorsaaneq oqarpoq.

AAMMA ATUARUK Nunatsinnukartussat qinnuteqaqqaartarunnaassasut: Nunarput ammaqqissaaq

- Piffinni allani akuersisoqarneruvoq. Ittoqqortoormiini akiuussutissamik neqeroorfigineqartut quliugaanta qulingiluat akuersisarput.

- Sapinngisamik amerlanerpaat akiuussuserneqarsimassapput. Tamanna inuiaqatigiinni ammaasoqarnissaanut alloriarnerit annertuut tulleraa.

Amerlanerpaalli akiuussuserneqarsimanissaat kiap akisussaaffigaa?

- Akiuussuserneqarnissaq ataasiakkaat akisussaaffigaat. Akiuussuserneqarusunnissarli inuiaqatigiinnut tamanut pingaaruteqarpoq. Naalakkersuisut assersuutigalugu nunatta avannaanut kitaanullu avataanit angalasoqarnissaa pillugu siunnersoraangatsigit tassani qanoq amerlatigisut akiuussuserneqarsimanerat apeqqutaasarpoq, Henrik L. Hansen oqarpoq.

Taamaammat akiuussusersuinerit maanna sukkatsinneqassapput.

- Maajimi aamma juunimi akiuussutissarpassuarnik naatsorsuuteqarpugut, nakorsaaneq oqarpoq.

Illoqarfinni annerni pingasuni 65-ileereersimasut akiuussuserneqarnissamik maanna neqeroorfigineqareerput. Illoqarfinni nunaqarfinnilu tikikkuminaatsuni 18-ileereersimasut aamma neqeroorfigineqareerput.

Tasiilami Ilulissaniillu avannarpasinnerusumi tulliani kapuisoqassaaq. Tamatuma kingorna taakkunani illoqarfiillu annerit sinnerini aappassaanik kapuisoqassaaq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

Siullermik kapitissimasut 20.216
Aappassaa kapitissimasut 8.611
Misissorneqareersimasut 26.882
Tunillanneqarsimasut 44
Peqqisseqqittut 40
Uninngasut 0
Anersaartuuteqartitaasut 0
Toqquteqartut 0
nun.gl-imi titartaganngorlugit:
Kapitissimasut | Tunillatsissimasut
 
   Nutarterneqarpoq: 
Juunip 11-at 2021 nal. 10:45