Nunatsinnukartussat qinnuteqaqqaartarunnaassasut: Nunarput ammaqqissaaq
Naalakkersuisut nutaat nakorsaaneq Henrik L. Hansen peqatigalugu nunatsinnik ammaaqqikkiartuaarnissamut alloriarnerup tullia ullumi saqqummiuppaat.
Nunatsinnut angalasoqarnissaa ukiortaamiilli matoqqalerpoq. Namminersorlutik Oqartussanullu qinnuteqaqqaarluni nunatsinnukartoqarsinnaalluni.
- Ullut sivisuneruleriartorput, aput aakkiartorpoq upernarluinnalerlunilu. Taamaammat aasaanerani aaqqissuussinissamut piffissamilu aggersumi pisussat pilersaarusiuleruttorpagut, Naalakkersuisut siulittaasuat Múte B. Egede (Inuit Ataqatigiit) oqarpoq.
- Nunatsinni tuniluuttoqartitsinaveersaarnerput avataanit isaasunut sukannerusumik killilersuinerit pissutigalugit iluatsippoq. Nunatsinni Danmarkimilu ilorraap tungaanut ingerlasoqarpoq. Tamanna pissutigalugu killilersuinerit qaffakkiartortumik qasukkarnissaat aalajangerparput.
Tikittut sapaatip akunneranut 600-t
Peqqissutsimut Naalakkersuisup nutaap, Kirsten L. Fenckerip (S) nunatsinnukarniartut ataasinngorpamit tassa maajip ulluisa pingajuannit aammaassiffigineqarnissaat tusagassiortunik katersortitsinermi oqaatigaa.
- Ukiup nikinnerani oqartussat timmisartuussisarnerannik taaneqartartumik ingerlatsisoqarpoq, tassa nunatsinnukarnissamut qinnuteqarsimasut killeqartut kisimik tikissinnaasimallutik.
Angerlarsimaanaqqusaanermut maleruagassat:
- Kalaallit Nunaannut tikikkuit ullut tallimat angerlarsimaannaqqusaavutit
- Ullut tallimassaani misissorteqqissaatit
- Angerlarsimaanaqqusaanivit nalaani pisuttuarsinnaavutit, najugaqatitit attaveqarfigisinnaavatit niuerniarsinnaallutillu
- Niuerniarninni assiaquteqarnissaq piumasaqaataavoq
- Pulaasanngilatit, pulaartoqassanngilatit, ataatsimoorfiusuniisanngilatit, bussissanngilatit, taxassanngilatit suliartornalluunniit
- Ullut tallimassaani misissortinnianngikkuit, tikinnermiit ullut 14-it angerlarsimaanassaatit.
- Periuseq taanna maajip ulluisa pingajuanni unitsissavarput, nunaniillu allanit killeqanngitsumik isaasoqarsinnaaleqqissalluni. Tassa imaappoq nunatsinnukarniartut qinnuteqaqqaartarnerat atorunnaarsinneqassaaq, peqqissutsimut naalakkersuisoq oqarpoq, nangillunilu:
- Tikittussalli killileqarnerat aallaqqaammut sapaatip akunneranut 600-nut killeqassaaq. Tassa imaappoq sapaatip akunneranut timmisartuni pingasuni ataatsimi 200-t ilaasinnaapput.
Københavnip Kangerlussuullu akornanni timmisartuussineq kisimi ammarneqassaaq.
Mattusimasoqarnissaanulli tikinnermiillu ullut tallimassaanni misissorteqqinnissamik piumasaqaateqarnerit atuutiinnassapput. Taamaammat nunatsinnukartut tikikkunik angerlarsimaannassapput tikinnerminniillu ullut tallimassaanni covid-19-imut misissortissapput, misissortinnermilu tunillatsissimannginneq aatsaat uppernarsarneqarpat inuiaqatigiit akornanni aatsaat angalasoqarsinnaalissalluni.
Tikinnermit ullut tallimassaanni misissorteqqinngikkaanni ulluni 14-ini angerlarsimaannartoqassaaq.
- Killilersuinerit tamarmik siunissami atorunnaarsinneqarsinnaajumaarnerat neriuutigaarput, Kirsten L. Fencker oqarpoq.
- Akiuussusersuinitsinni ingerlaqqikkutta killilersuinerit uteqqiasut soorlu kommunimit kommunimut angalasuni katerinnissamut killilersuinerit aamma misissoqqissavagut.
Killilersuinerit qasukkarnerat maajip ulluisa 31-ata tungaanut atuutissapput. Naalakkersuisut nakorsaanerullu killilersuinerit qanoq qasukkarneqartigissanerat sukannersinneqassaneriluunniit ingerlaavartumik naliliiffigissavaat.
- Naalakkersuisut inuiaqatigiinni ammaasseqqinnissamut annertuumik pilersaaruteqarput, maannakkulli akiuussusersuinerit nunanilu allani coronamik tunillatsittut ineriartornerat qanoq ingerlanerat eqqarsaatigaagut. Siusinnerpaamik aggustip septembarilluunniit qaammataani ammaavissaagut, Múte B. Egede oqarpoq.
- Inuiaqatigiittut ataasiakkaatullu inuiaqatigiinni akisussaaffimmik tigusilluta akiuussuserneqarnissatsinniippoq.