Immikkut ilisimasalik naliliisoq: Kommuninut ’qinersineq pissanganaqisoq´

Kommunimut qinersineq naammassereermat kommunini tallimani isumaqatiginninniarnerit aallartereerput. Partiilli qinersinermi qanoq angusaqarpat?

Ilisimatusarfiup Inuiaqatigiilerinermut, Aningaasaqarnermut Tusagassiornermullu immikkoortortaqarfiani ph.d.-nngorniaq, Najaaraq Demant-Poort, KNR-imit apersorparput.

Taanna partiit sorliit siuariarsimanersut, partiillu sorliit kinguariarsimanersut pillugu apersorparput. Kikkut ilaasortaatitaqalerpat kikkullu isertitaqanngitsoorpat.     

Kommunimut qinersineq pissanganarsimaqisoq, qinersisartullu allannguerusunnerminnik takutitsiffigigaat, Najaaraq Demant-Poort oqarpoq.

- Pingaartumik marluk maluginiagassaapput. Arnat amerlanerulernerat Demokraatillu siuariarnerat, taanna oqarpoq.

Atagumi takoriartigit! Ajugaasuniit aallartissaagut. 

Siumut annersaalersoq

Naak Siumut assoralisimaarfiugaluarluni, ilaasortanik annaasaqaraluarluni aamma nutaamik siulittaasoqaleraluarluni kommunimut ukioq manna qinersinermi partiini annersanngorpoq. Suulli tamarmik siuariarfiunngillat.  

Kommunimut 2021-mi qinersinermut sanilliullugu Siumumik taasisut tuusintit sinnilaarlugit ikinnerulerput.

- Naak Demokraatit siuariaraluartut, Siumut inissisimalluarpoq, pissutigalugu Kalaallit Nunaanni kommunini aqutsineq qangaaniilli ingerlasuuvoq innuttaasunullu qanittumik inissisimasarluni, Najaaraq Demant-Poort oqarpoq.

Inuit ingerlatsineq pillugu toqqissisimanerannut tatiginninnerannullu pissutaasoq tassaavoq patajaassuseq, taamaammallu kommuninut qinersinermi Siumut suli tapersersorneqarluarluni.     

Naalli patajaassusermik kissaateqartoqaraluartoq qinersisartorpassuit allannguinissamik kissaateqarput – soorlu Inatsisartunut qinersinermi Demokraatit siuariarujussuarnerat eqqarsaatigalugu. Tassa politikkikkut pisunik allanngoriartuaartoqarnera malunnarpoq.

Demokraatit siuariartut

Demokraatit politikkernermi nikeriarnerpaapput. Kommunimut 2021-mi qinersinermut sanilliullugu ukioq manna kommunimut qinersinermi partiimut taasisut 3.500-nik amerlanerupput. Soorliuna qinersisartunit taama nuannarineqartigisut.   

- Sunarpiaq pissutaanersoq oqaatigiuminaappoq, allannguerusuttoqarnerali takuneqarsinnaavoq. Namminersortunik siuarsaanissaq aamma suliffinnik amerlanerusunik pilersitsinissaq taakkua ukkataraat, Najaaraq Demant-Poort oqarpoq nangillunilu:

- Tamanna qinersisartut nutaanik eqqarsarusuttut aamma pisortat suliffeqarfiutaannik ukkataqarpallaarunnaarsitserusuttut kajungerfigilersimasinnaavaat. Tassami Siumut IA-lu pisortat suliffeqarfiutaannik ukiorpassuani pingaartitaqartarput.     

Inuusuttulli amerlanerusut qinersinerat aamma politikkikkut pingaartitaasa allaanerunerat nassuiaatinut ilaasinnaasoq taassuma aamma erseqqissaatigaa – kinguaariinnilu nikittoqalaarunartoq takuarput.  

Kinguaariit nikinnerat eqqaariaratsigu tullianut ingerlaqqeriarta. 

Kommunimut qinersinermi Inuit Ataqatigiit qinersisartunik annaasaqangaatsiarput. Assi © : Mads Claus Rasmussen/Ritzau Scanpix

IA ajorsarnerpaasoq

Siuariarujussuartuniit kinguariangaatsiartunut saassaagut. Tassa Inuit Ataqatigiit.

2021-mi qinersisut affaat sinnerlugit maanna annaaneqarput, taassumalu saniatigut borgmesteriutitatik marluk annaarpasilerpaat.

Kommune Qeqertalimmi aamma Kommune Kujallermi Inuit Ataqatigiit borgmesteriutitaqarnertik aannaasussaarpasippaat. Sermersuumi susoqassanera suli nalunarpoq.

Allanngortoqarnissaanik kissaateqartoqarunarnera, pingaartumik Kommune Kujallermi qinersiartortuni malunnarpoq.  

 - Kommune Kujallermi kinguariarneq kommunimi pisunik patsiseqarsinnaavoq. Qineqqusaartut piginnaasaqassusaat aamma inernernik kusanartunik tunniussisinnaassuseq qinersisartunit aallaavigineqakkajuttarpoq, Najaaraq Demant-Poort oqarpoq.   

Naleraq Atassullu

Naleqqami Atassummilu allannguuteqartoqangaanngilaq. Tassami kinguariarujussuartoqaralunilu siuariarujussuartoqanngilaq. Tamannali Najaaraq Demant-Poortip tupigusuutigivallaanngilaa.  

- Taakku partiit Kalaallit Nunaata naalagaaffeqatigiinnermut aamma nunarsuup sinneranut attaveqarnera qineqqusaarutigaat – sumiiffimmilu politikkimut tunngasut pivallaarnagit, taanna oqarpoq.

Taanna pissutigalugu, pingaartumik Naleraq qinersisartunit taperserneqarujussuanngitsoq, taanna isumaqarpoq. 

Naleqqap Atassutillu kommunimut quinersinermi angusaat nutaartaqarpallaanngillat. Assi © : KNR / Malik Brøns

Qulleq qinigaatitaqanngitsoq

Partii Qulleq kommunimut siullermeerluni qinigassanngortitsisoq iluatitsivallaanngilaq. Partiip nutaap ineriartornera sivisusinnaasartoq, Najaaraq Demant-Poort oqarpoq. Aammali anguniakkat Qullermeersut ersernerlussimanerat taassuma uparuarpaa, qinersisikinnerannullu pissutaagunarluni.     

- Partiit pingaartumik nutaanik anguniagallit qinersisartunit taperserneqarnerupput. Politikerit partiinit allanit nuuttut Qullermiipput, anguniagaallu taakkutoqaanerupput, taamaammat nutaanik isumassarsiaqanngitsutut paasinarsinnaalluni, taanna oqarpoq.  

Taamaallilluta partiit tamakkersimalerpagut. Isumaqatiginninniarnerit naammasseriarpata kommunalbestyrelsenilu inissititsertoqareerpat politikkikkut qanoq pisoqarnissaa pissanganarpoq.    

Kommunimi politikerinngortussat nutaat, siunissamilu anguniagaat qanoq sunniuteqassanersut suli nalunarpoq, ataaserli qularnanngilaq – qinersineq pissanganarluinnarpoq.