Avannaata Kommunia:

Nunatta avannarpasinnerpaartaani Siumut partiini anginerpaalerpoq. Partii qinersisut 36,2 procentiinit taaguunneqarpoq.

Demokraatit taaguunneqarnerpaat aappaatut inissippoq, Nalerarlu pingajuattut inissilluni.

Naallu Siumut kommunimi anginerpaajoqqikkaluarluni kommunimut 2021-mi qinersinermut sanilliullugu 10 procentpointimik kinguariarpoq.

Kommunimilu borgmesterimut qinigassanngortittoq Demokraatineersoq, Heidi Møller taaguunneqarnerpaajuvoq. Taanna 625-nit taaguunneqarpoq.

Qinersiviit matoqqammitsiartut Heidi Møllerip ajugaanissani neriuuteqarfigilluarlugu KNR-imut oqaatigaa.

Kommuneqarfik Sermersooq: 

Kikkut borgmesterinngortitsinissaat pillugu unammineq naligiiffiuvoq.

Partiit Siumut aamma Inuit Ataqatigiit (IA) tamarmik immikkut arfineq-marlunnik qinigaatitaqarput, taamaammat partiit marluk kommunalbestyrelsimi oqartussaanissamut tunngaviusumik isumaqatigiinniarsinnaapput.

Ataasiakkaanik taaguussinermi borgmesteri, Avaaraq Olsen (IA) SIumumit Martha Abelsenimit marlunngornermi qinersinermi qaangerneqarpoq. Martha Abelsen 675-init taaguunneqartoq Avaaraq Olsen taassuminnga qulinit taaguunnikinneruinnarpoq.

Borgmesteritut issiasoq Inuit Ataqatigiinneersoq Avaaraq Olsen Assi © : KNR.

Siumup Inuit Ataqatigiillu illoqarfiit pingaarnersaanni piffissami nutaanerusumi naligiittarnerat qaqutigoortuuvoq.

Demokraatit ullumikkut qinersisoqarneranit sisamanik qinigaatitaqarput.

Kommune Kujalleq: 

Demokraatit arfineq-marlunnik qinigaatitaqarlutik partiini anginerpaalerpoq. Siumullu tallimanik qinigaatitaqarluni tulliatut inissippoq, IA-lu pingasuinnarnik qinigaatitaqarluni.

Inuit Ataqatigiit nunatta kujasinnerpaartaata kommuniani ukiut sisamat matuma siorna qinigaangaatsiartoq nakkakattarpasippoq. IA Qaqortumi 30 procentpointit missaannik kinguariarpoq, partiillu anginerit pingajuattut inissilluni.

Malene Vahl qinersinersiornermi nuannaangaatsiartoq Assi © : KNR

Demokraatit qinersisut 53 procentiinit taaguunneqarlutik partiini anginerpaalerput, 53 procentpintinillu siuariangaatsiarlutik. Nunatta kujataani qinigaanerpaaq – Malene Vahl 361-init taaguunneqarpoq.

Siumut 24 procentinit taaguunneqarluni partiit anginerit aapparilerpaat, partiili aamma 25 procentpointimik kinguariarpoq.

Kommune Kujallermi borgmesterip, Stine Egedep (IA) borgmesterip allaffiani pigisani ulluni tulliuttuni poortortussaarpasippai.

Taanna ullumikkut qinersinermi 80-iinnarnit taaguunneqarpoq. taamaalillunilu nunatta kujasinnerpaartaani qinigaanerpaani 15-ini 14-itut inissilluni.

Taanna kingullermik 2021-mi qinersisoqarmat Kommune Kujallermi qinigassanngortittut akornanni taaguunneqarnerpaavoq: Taamani 410-nit taaguunneqarpoq.

Kommune Qeqertalik:

Kommune Qeqertalimmi Siumut partiini aamma annerpaalerpoq. Partii 2021-mi qinersinermut sanilliullugu 14 procentpointimik siariarpoq.

Demokraatit partiit annerpaat tulliatut, Inuit Ataqatigiillu pingajuattut inissipput.

Taaguussinernut ataasiakkaanut atatillugu Demokraatinit Simigaq Heilmann taaguunneqarnerpaavoq. Taanna 204-nit taaguunneqarpoq. Naallu taaguunneqarnerpaagaluarluni 2021-mi qinersinermit kinguariaateqarpoq, taamani 223-nit taaguunneqarpoq. Taamaammat qinersisartut 19-it qinersinermi matumani allamik qinersisimapput.

- Attortingaatsiarpunga, pissanganaqalunilu.

Qeqqata Kommunia: 

Nunatsinni illoqarfiit annersaata tulliani Siumut 41 procentinit taaguunneqarpoq, tamannali 4,5 procentpointinik kinguariarnerulluni.

Demokraatineersoq Rachel Ingemann taaguunneqarnerpaavoq – tassa qinersisartut 657-it taanna qinerpaat.

Borgmesteri Siumumeersoq, Malik Berthelsen taagunneqarnerpaat tulliatut inissippoq: 477-it taanna qinersimavaat. Taamaalillunilu borgmesteritut ingerlaqqissinnaalluni.