Kommune Kujallermi borgmesteri, Stine Egedep (IA) borgmesterip allaffiani pigisani ulluni tulliuttuni poortortussaalerunarpai.

Taanna kommunimut qinersinermut matumani 80-iinnarnit taaguunneqarpoq, taaguunneqarninilu pissutigalugu nunatta kujasinnerpaartaani qinigaanerpaani 15-ini 14-itut inissilluni.

Taanna kingullermik 2021-mi qinersisoqarmat Kommune Kujallermi qinigassanngortittut akornanni taaguunneqarnerpaavoq: Taamani 410-nit taaguuneqarpoq.

Inuit Ataqatigiit kommunimi taamaalilluni kinguariangaatsiarpoq. IA Qaqortumi 30 procentpointingajannik kinguariarpoq, kommunalbestyrelsimilu pingasuinnarnik qinigaatitaqalerluni partiit annerit pingajuattut inissippoq.

8 millioninik atuivallaarneq akileraarutinullu akiliutissat 40 millionit amigaataasut

Muminganilli Demokraatit Kommune Kujallermi qinigaatitaqarluarput: Qinersisut 53 procentii taasipput, partiilu 53 procentpointimik siuariarluni.

Stine Egedep suliffini annaangajalersinnaallugu ilisimalluarlugu KNR-imut oqaatigaa:

- Ajunngilanga tassa imaattoq eqqortumik oqalulluni qineqqusaarsimagaanni aamma pissutsit piviusut eqqartortarsimagaanni taava ilaatigut pikkunaagineqartarput, uanga unneqqarinneq pingaartittuaannarnikuuara, aamma inuutillunga innuttaasunut sulitillunga piviusut eqqortut eqqartortuassavakka, qanorluunniit uani qinigaaninnik akeqassagaluarpata, taanna oqarpoq.

- Ajunngilanga soorunalimi pakatsivunga innuttaasut immaqa uanga paasissutissiisimanermut naammassimanngimmat sulinitsinni angusatsinni tamakku uagut nammineq pisuussutigivarput.

Stine Egedep Kommune Kujallermi borgmesteriunerani sulianik ajortunik pisoqallattaasimavoq. Naatsorsuuserinermi kukkunerpassuit 2024-mi missingersuutinut atatillugu 8 millionit koruuninik atuivallaarnermik kinguneqarput. Tamatuma saniatigut Aningaasaqarnermut Ataatsimiititaliap A-skatinik Namminersorlutik Oqartussanut qaammatini pingasuni akiliisoqarsimanngitsoq siorna apriilimi paasivaa. Taakku 40 millionit koruunit missaannik naleqarput.

Inuusuttoq pikkorissoq borgmesterip allaffianukariartortoq

Taamaakkaluartorli nammineq oqarnera naapertorlugu kommunip aningaasaqarnera iluarsiniarlugu kommunimut qinigassanngorteqqippoq. Inatsisartunullu marsimi aamma qinigasasnngortilluni - qinersinermili tassani 33-nnarnit qinerneqarpoq.

Demokraatinit 30-nik ukiulik taaguunneqarnerpaasorlu Malene Vahl Qaqortumi borgmesterip allaffianut isingajalerpoq. Demokraatit kommunalbestyrelsimut arfineq-marlunnik qinigaatitaqarpoq, Stine Egedelli suleqatigiissinnaanissaq neriuutigaa:

- Pilluaqqungaarpakka demokraatit inuusuttunnguit pikkorissut taava aamma sulilluarnissaanik kissaappakka aamma suleqatigiissagutta suleqatigiissanngikkuttaluunniit uagut pissutsit piviusut killiffiininngaanniit suleqataanissatsinnut aamma piareersimavugut, Stine Egede KNR-imut oqarpoq.

Kommunimut ukiut sisamat matuma siorna qinersisoqarmat IA qinigaarujussuarpoq. Qineqqusaarnerup ilarujussua Kuannersuarnut tunngavoq. Australiamiummi aatsitassarsiutileqatigiiffiat, Greenland Minerals aatsitassanik qaqutigoortunik Kuannersuarni Narsamit 7 kilometerinik ungasissuteqartumi aatsitassarsiorfimmi ammasumi piiaanissamut akuersissuteqarfigineqarsimavoq.

Aatsitassat qaqutigoortut assersuutigalugu oqarasuaatini angallattakkani anorisaatinilu atorneqartarput. Suliniummili uranimik piiaanissaq ilaammat tamanna isumaqatigiinngissutaavoq.

Kuannersuarnit sumiiffimminilu allanit uranikmik piiaasoqannginnissaa IA-p taamani qineqqusaarutigaa, tamannalu tusaaniarneqarluarmat partii ajugaangaatsiarpoq.