Vivian Motzfeldt Siumumi siulittaasunngorpoq
Siumup ippassaq qinersinermi angusarluissornera Erik Jensenimut kinguneqarpoq, taanna tunuassalluni aalajangermat.
- Ukiuni ingerlasimasuni partiip tatiginnissimaneranut annertuumik qujassutissaqarluni, aamma Siumumut siulittaasuusimaneq taavalu ataatsimoornermik pilersitsisimanini ataqqinaatissatut isigigini Erik Jensen oqartoq Siumup tusagassiorfinnut nalunaarutaani issuarneqarpoq.
Siulittaasutut toqqarneqartoq, Vivian Motzfeldt, suliffigiligassamini akisussaaffimmik angisuumik tunineqarsimasutut misigisimavoq.
- Vivian Motzfeldtip suliassanut qitiusunut ilaatippat, aningaasarsiornitta patajaatsumik ingerlanissaa, nangittumik ilinniartitaanikkut nukittorsaanissaq, naligiinnginnerup nangittumik aaqqissuuseqqinnikkut akiorneqarnissaa, suliffissat pilersinneqarnissaat aamma akisussaaffilimmik naalakkersuinikkut ingerlatsisoqarnissaa, Siumut tusagassiutinut nalunaaruteqarluni allappoq.
Siulittaasunngorniunnermi Kim Kielsen uppisereernerata kingorna Erik Jensen 2020-mi siulittaasutut qinerneqarpoq. Kim Kielsen 32-nik qinerneqarpoq Erik Jensen 39-nik qinerneqartoq.
Siumumi siulittaasunngorlaaq Vivian Motzfeldt 2020-mi siulittaasutut qineqqusaarpoq, maannamulli atorfigisamini siulittaasup tulliatut inissippoq.
