Qaqortumi innuttaasut: Sooq-una tamaanga killittugut?

Kommune Kujallermi inunnik isumaginnittoqarfimmi akisussaaffik Naalakkersuisunit tiguneqarallarnera Qaqortumi innuttaasut ilaannit ajoriffissaqartinneqangilaq.

Ilaasali tamaanga killittoqarnera uggoraat.

Kommune Kujallermi inunnik isumaginnittoqarfiup akisuussaaffiisa ilaannik Naalakkersuisuniit ikiorneqartussanngornera, 83-inik ukiullip Kalunnguaq Poulsenip ajorinngilaa.

-Tassa tiguniarlissuk, uanga napparsimanerma kingorna isumagineqanngisaannarama kingulliit isumagineqarniassapput.

Ikiortissarsiorlutimmi saaffiginnikkaluartartut tusartuartarpai.

-Tassa tusaamasarakku arlallit oqartaramik saaffiginnikkaluarlutik ikiorneqarsinnaangitsut, taamaammat tassa iluarissagaluarpara taama ikiorneqartuuppata.

Kommune Kujallermi inunnik isumaginnittoqarfiup akisuussaaffiisa ilaannik Naalakkersuisuniit ikiorneqartussanngornera, 83-inik ukiullip Kalunnguaq Poulsenip neriuutigaa. Assi © : KNR / Jørgen Semionsen

Annertunerusumik ikiorsiisoqartariaqartoq KNR-ip aqqusinermi naapitai ilai isumaqarput.

Suliassat kommuunip kivissinnangippagit Naalakkersuisunit isumagineqartariaqalernerat, Otto Ottosenip ajoriffissaqartinngilaa:

- Kommuunip saperunigit soorunami aamma pisussaatitaavoq immaqa tamakkununnga tunngasunik tunniussisinnaanermut, kisiat aamma isumaqarpunga nukittunerusariaqartut kommunemi sulisut, kommunalbestyrelsi.

Kujataani pissutsit ilungersinarsiartornerat Otto Ottosenip malinnaaviginerarpaa:

- Ukiuni kingullerni malunnartumik kujataa unittooqqavoq, unittooqqavilluni unittooqqavoq. Uagut suligaluarpugut sulisartuuvugut, kisianni tupinnaqaaq nunatta kujataani manna suna tamarmi nipaarunnikuuvoq.

Kommune Kujallermi kommunimi sulisut ikiorsiisinnaanissannut aningaasaliiffigineqarnerunissaat Otto Ottosenip kissaatigaa. Assi © : KNR / Jørgen Semionsen

Naak naapitatta amerlasuut ikiorsiisoqarnera nuannaarutigigaluaraat, Kommunip tassunga killinnera naapitatta ilaasa eqqarsarnartoqartippaat.

Rosine Manassen ilagaat:

- Tassunga killissimagutta taava eqqarsarnarpoq, imalunniit ima apererusunnarpoq sooruna tassunga killittugut? suunuku iluarsisassaasimasut? imaluunniit suunuku inuiaqatigiinni oqaluuserisassarisimagigut.

Kommune Kujallermilu killilliffik Thala Pikep ima oqaaseqarfigaa:

- Uggorisorujussuuara Kommune Kujalleq tassunga killissimammat, pissutigalugu pisariaqarsorigakku inunnik sullissineq iluamik ingerlasariaqaleraluarami.

Kommunip inunnik sullissisussaaleqinera pillugu Kalunnguaq Poulsenip aamma eqqarsarnartoqartippaa:

- Aamma sulisussat ajornakusoorpalunnermik maani, suna pissutaanerpoq, inuit eqiasuttut immaqa amerlanermik, hahahaha.